Турциянал билаят бигьалаган гьан дакIнийсса инсантуран ца язимур кIанттуну ккаллину бур. Туризмалул индустрия тIурча, тикку мудангу хьхьичI ххуттай дур. Яла чIявуми туристъталгу, нех дирхьуну, Турциянавун бур, мунийну билаятрал экономикалун хъунмасса хайр хъанай бур.

Амма ца хьхьу-кьини Турциянал шагьрурду чIан-лаялун бан­сса зарзала хьунни. ЛивтIусса ва щавари хьусса цикссагу бур. Кьини дуркнал чIарав бацIлай, дунияллийцири кумагру буллай бур. ЛивтIуминнал аьдад 41 азарунния лирчусса дур. Уттигу ливтIусса ва бивщусса лекьрурдала личин буллайнма бур. Хъанахъисса иширтталлив мяйжан буллай бур цайминнал дардирал чIарах буклакимигу чансса бакъашиву. Мукунссаннан ккалли хьунни Турциянал шагьрурдайсса личIи-личIисса патирдаву ялапар хъанахъисса туристътал.
ХIакьинусса кьини Антальялий кьамул увну ур 55 азара бала- апатIрахьхьун иривсса инсан. Миннал аьдад гьантлия гьантлийн хъунна хъанай дур. МЧС-рал зузалт ми уттигу автобусирттай ххилайнма бур. Ли­хъачалт кьамул буллай бур Мармарис, Фетхие, Бадрума, Измир ва Каппадокия шагьрурдай.

Патирданул заллухъру кьини дурксса инсантурал чIарав бацIлай бур, амма турисътуран му бувчIин ччай бакъар. Мармарис шагьрулий патирдануву зузисса оьрус хъамитайпалул буслай, ремонтгу анавар дуккан дурну, патирданул бачIи лихъачалтрахьхьун буллуну бивкIун бур. Му турисътурахун бахчай­сса корпус бакъасса бур. Амма туроператортурая чIявусса зангру дукIлай диркIун дур, турисътал арцу махъуннай тIалав дуллай бур, анавархъиндарай масъала щаллу бара тIий.

Шагьрурдавусса хъамалханардал заллухъру тIурча, баян буллай бур, лихъачалтрал лагерьдания архну бигьалаган ччисса турисътуран къатри 500 долларданух ижаралий дулунну тIий.
ТурциянаяцIун бавхIуну зузисса туроператортал буслай бур, цанма чIалай бивкIшиву укунсса иш хьунтIисса, мунияту хьхьичIва баян бувнугу бивкIун бур патирдал заллухъруннайн Турциянавун бигьалаган нанисса инсантал махъаллил хьун бюхъайшиву.

Турциянавунсса путевкардал цIухху-бусу 25%-30% ялавай багьну бур, миннуя махъаллил хьуну бур 10% инсантурал.
Зарзала хьуннин ларсун диркIсса путевкардах арцу зана дуван тIий дакъар. Туркомпаниярттай аьй хъанай дакъар, туристътал лихъачалтращал бигьалаглан къаччай бушиву вайннан багьайсса масъала бакъар.

Бур цамургу масъала, туристътуравун буруккин бутлатисса. Ми нигьа буслай бур цIунилгу зарзала къахьун. Па­ччахI­лугърал хъуниминнал Турциянавуцири патирду ххал бигьин сакин бувну бур хасъсса комиссия. Утти ми патирдал ялтту буклай, миннул цIакьшиву кIул дуллай занай бур.
Лихъачалт буккан бан патирдал заллухъру дакIний бакъар, лагерьдай ялугьлагьисса лихъачалтгу цикссагу бур. Ми автобусирттай ва самолетирттай ххилай бур.
Туристътуран тIурча, цала арцух цанма ччикун бигьалагансса бигьашиву ва паракьатшиву ччай дусса дур. ХIасил, захIматсса чIумалгу бигьашиву ччай дур.