Ватан дуруччултрал кьинилун хасну ЦIуссалакрал райондалул администрациялул вакилтал бивунни Украиннал аьрщарай нанисса хасъсса операциялуву жанну дуллусса аьралитурал кулпатирттачIан, миннавух ца ятIа-тIар бакъа акъа хьусса аьраличунал кулпатрачIангу.
Райондалул чулухасса делегациялувух аьралитурал кулпатирттачIан бивунни ЦIуссалакрал райондалул бакIчинал бигарду биттур буллалисса Сулайман Рамазанов, ванал цалчинма хъиривчу Султан ХIамзатов, хъиривчу СалихI Каравалиев, райондалул мажлисрал председательнал бигарду биттур буллалисса Амин Оьмаров, ДР-лул Халкьуннал Мажлисрал депутат Артур Исрапиловлул жяматийсса кумагчи Зайнуллагь Мирзоев ва шяраваллал администрациярттал бакIчитал, депутатътал.
ЦIуссалакрал райондалул администрациялул чулуха дуки-хIачIиялийнусса кумагру бунни аьралитурал кулпатирттан. Му бакъассагу, арцуйнусса кумаг бунни ДР-лул Халкьуннал Мажлисрал депутат Артур Исрапиловлул. Аьмну ва кьини аьралитурал ряхва кулпатран бунни арцуйнусса ва сурсатирттайнусса кумагру.
Сулайман Рамазановлул, хасъсса операциялуву жанну дуллусса аьралитурал кулпатирттахь цIухху-бусурду бунни цукунсса захIматшивурттащал хьунабакьлай буссарив ва ци кумагру аьркинну буссарив.
Вайнналгу кIицI лавгунни ххуллурду бакьин баврил, гьайкаллу цIу дуккан даврил, аьралий операциялуву жанну дуллусса аьралитурал мюрщими уссурвавран аьрщи итадакьаврил масъалартту ва барчаллагь увкунни цахра дуллалисса къулагъасрахлу.
Шикку гьаз бувсса цинявппа маъслартту дузрайн буккан баврил ялув ацIан цала бакIрайн лавсунни Сулайман Рамазановлул.
