[dropcap]Ф[/dropcap]евраль зурул 27-нний Лакрал театрдануву хьунни Дагъус­ттаннал халкьуннал артист Шамил Керимов дунияллийн увккун 75-шин шаврин хас бувсса аьпалул мажлис.

Артист дакIнийн утан був­кIун бия ванал гьунарданул икрамчитал, гьалмахтал ва гъан-маччами.
Артистнал оьрмулия ва творчествалия бувсунни Дагъусттаннал халкьуннал артистка Луиза Шахдиловал.
Ванил кIицI лавгунни Шамил Керимов ккалли хъанай ушиву ларайсса театрал кIулшиву ларсъсса цалчинминнавухсса артист. Цувгу Лакрал театрдануву зун увкIун ур 70-ку шиннардил дянив, Ереваннай театрал институт къуртал бувну. Театрданувунгу бакIрайн агьну ур оьрчIниявасса хиялданул увцуну. Школалий царагу мероприятие лях къалагайсса диркIун дур Шамиллул чялишсса гьурттушинна дакъасса: жагь байрандалул мажлис бачин бувну, жагь муний шеърирду ккалай ягу интермедиярттавух гьурттуну.
Нитти-буттаннив бавнувагу ччай къабивкIун бур арснал оьрму театрдануцIун бахIин ччай ушиву. Шамилгу ниттих вичIидирхьуну дуклан увххун ур Дагъусттаннал шяраваллил хозяйствалул институтравун.

Дуккаву ккаккиялунсса диркI­хьурчагу, дакIмур кIункIу тIий диркIун дур театрданувун. Кьадарданулгу ванацIун кабавкьуну бур -–1969 шинал Ереваннал театрал институтраву лакрал студия тIитIайхту, Шамилгу лавгун тихун, хьхьичIунну экзаменнугу дуллуну, увххун ур.

Жагьилнал дакIнивусса гьавас чIалай, актершиврул усттаршиву кIулсса ххаллилсса педагогтал, профессор Арташес Овсепян ва доцент Александр Кочарян гъирарай лахьхьин дуллай бивкIун бур актернал пишалул кьюлтIшивуртту. Шамил Керимовлунгу студентну унува лавхьхьуну бур режиссернал бусаннин къаавцIуну, цала ляхълан рольданувусса кици. Педагогтурая чIявусса лахьхьирчагу, Шамил даин хIарачат буллай ивкIун ур цала лагу-лявкъуну, язи бугьан рольдануву агьаммур. Курсовой давурттугума мукун щаллу дулай ивкIун ур.
Артист дакIнийн бутлан икIайва тIар, цуксса захIмат хьу­ссарив цанма А. Ширванизадел «Из-за чести» тIисса пьесалува­сса бутIуву роль дугьан. Педагогтал, архIал дуклакими, цайми студиярттай дуклакисса гьалмахтал хIарачат буллай бивкIхьурчагу кумаг бан, цала геройнал биография кIанийн бувтун лакъавхьхьуну, ганал куц аьч къабувну, паракьат къавхьуну ур. Ахиргу, хIасул дурну дур Арташес Оторяннул хIакьсса сипат.

Шамил Керимовлул дургьу­сса роллу дакIнийн дирчунни ДР-лул Театрал ишккаккултрал союзрал хъунаманал хъиривчу Байсолтан Осаевлул, дагъус­ттаннал телевидениялул хъунаманал хъиривчу Салам Хавчаевлул, Лакрал райондалул админист­рациялул бакIчинал хъиривчу Явсупи ХIамзаевлул, дагъусттаннал халкьуннал артист Нариман Акавовлул.
Буслай бия Шамил Керимовлущал цачIу дурсса давурттая, кIицI лаглай бия ванал дургьусса гьарцагу роль диркIшиву яргсса, хIакьинусса кьининийнгу тамашачитуран дакIний лирчIсса: биргьаравсса Городничий Н.В.Гоголлул «Ревизорданувусса», Надир-шагьнал аьрал ххит бувсса зунттал агьалинал кьюкьлул бакIчи, лакрал миллатрал виричу Хан-Муртазааьли. Цинярдагу личIи-личIисса, цанниха ца къалархьхьусса роллу. Иминсса, цала цува увгьусса ХIасан, Р.Хубецовал «Ниттия дурксса цIа» пьесалувасс, ренессанс заманнул инсан, князь Оьмахан К. Мазаевлул «Гъази-Гъумучиял серенадалуву», дачIра хьусса шяраваллия, кIикку цурдалу лирчIсса ялгъузсса Удрида бавая пикрирдай, шагьрулул ва шяваллалил дя-зуманив ливчIсса Мансур К. Мазаевлул «Удрида бава» пьесалуву, «Семья» тIисса Да­гъусттаннал телевидениялий дурксса цалчинсса сериалданувусса кулпатрал бакI.

Цала яргсса гьунарданухлу «Дагъусттаннал халкьуннал артист» тIисса ларайсса цIанин дахьа-дахьа лайкь хьусса Шамил Керимов лавмартсса цIуцIаврил уцан увну ур сахIналия, дукъаргьунна лирчIун дур артистнал цIа дуккан дансса ярг-яргсса роллу. Лавмартсса цIуцIаврил зевххунни оьрмулул чагъираву жула дянива ххаллилсса артист.
Ихтилатирттая махъ ккаккан бувунни Шамил Керимовлул дургьусса Городничил рольданун цила чIумал центральный прессалул лавайсса кьимат бивщуну бивкIсса Н.В.Гоголлул пьесалиясса спектакль «Ревизор».

Муния махъ Дагъусттаннал халкьуннал артист Аслан МахIаммадовлул кIицI лавгуна, гьунар бусса яргсса актер ушивруцIун, Шамил Керимов ивкIшиву Лакрал театрданул гьарцагу буруккин цалану хIисав буллай, мунил цIаний цащава шаймур буллалисса инсан. Ахирданий Шамил Керимовлул уссил Апаннинал ва кулпатрал ПатIиматлул ссил душнил Сабинал барчаллагь увкуна Лакрал театрданул каялувчитурахь ва коллективрахь гъанчунал аьпа ябуллай бушиврухлу.