Вай гьантрай Гъумукун бувкIун бия Екатеринбург шагьрулий ялапар хъанахъисса Яна Раджабова, цила буттал махри шиччасса бушиву кIул бувну.

Мунил хIакъираву цала Телеграм-каналданий буслай ур Лакрал райондалул бакIчи Юсуп МахIаммадов.
– Вай гьантрайна хьунаавкьура караматсса хъамитайпалущал. Яна Раджабова Гъумукун бувкIун бур буттал мархрах луглай, ппухълуннал аьрщарахсса мякьлил бувцуну. Шикку ванил лявкъуну бур цила буттал Бадавинал къаттагу. ХIайран хьуну ливчIунна буттал улклул тарихрая кIул бан ччисса ванил дакIнил гьавасрай. Кьадарданул дунияллийх кIама бищун бувсса жула ватанлувтуран эбратну хьунссар тIий ура ва ишгу, – тIий ур Юсуп МахIаммадов.

Ххарину буслай бур Яна, буттал ватандалийнсса аьрххи тIайлабацIусса хьунни тIий.
– Цинявннал на, ваца ттухва ялугьлай бивкIсса кунма, хьунабавкьунна, дакIру тIиртIуну. Гьарма ия хъамалу оьвтIий. Дурунни ххаллилсса хъамалушин. Ххал бав кIива музей, шанма мизит. Я батIин къахъанай ливчIунна зунттал тIабиаьтрая. Асардалгу бувччуну най бура махъунмай, дакIгу шийх, буттал ватандалий, кьариртун. Заннал кабакьавкьуну, бучIанна гъинттул, ттула душгу бувцуну, – тIий бур Яна.
(Яна Раджабовал аьрххилия балжину бусанну хъиривмур номерданий)