ХIуру нис – къюкIлин
Жулла къюкIлин яла мюнпатмур сурсатну хъанахъиссар хIуру нис (творог). Ваниву чIявуссар сосудирттан чара бакъа аьркинсса белокру, мукунма витамин Д, цилгу агьамсса кIану бугьлагьисса нервардал ва къюкIлил системартту ххуйну зузавриву.
Гьантлун –
ца гьивч
Гьантлун ца гьивч букаву ккаллиссар арулла азарданиясса дайшишрулун. Гьивчул яла хъуннамур аваданшивуну хъанахъиссар шивусса антиоксидантру, цалгу инсан къюкIлил ва сосудирттал азардая, ччяни хъунав шаврия уручлачисса.
Ялагу ца агьамсса кIану: ахъулсса хъунмасса хIаллай ядуллалисса, чIумал шивусса витаминну къаличIарчангу ягу чан хьурчангу, антиоксидантруми бусса куццуй личIайссар.
Гьивч цуппагу, бюхъавай, бувкуну хъинссар ккирттаращал.
Шиккува кIицI лаган, щюллимур гьивч ятIулмунияр хъинссар.
Бадиржандалуву чIяруссар мюнпатсса затру
Бадиржан (баклажан) жунна хъинну хъинссар. Ванивуцири мюнпатсса затру хIисав дуллан бивкIукун, вайннул, кальцийрая тIайла хьуну, цинкрай бияннин, Менделеевлул таблицалувасса хъинми затирттал диялсса сияхI щаллу дуллай дур.
Мандаринну – жагьилшиврун
С витамин бусса цаймигу ахъулссаннул кунна, мандаринналгу кумаг бувайссар жагьилшиву дуруччин. Хъунав шаврийн къаршину дацIайсса затирттал сияхIрай цитрусрал ахъулсса шамилчинсса кIанай дур.
