Хъаннил байрандалул хьхьичI гьантрай «Единая Россия» партиялул хъаннилмур ккурандалул хасъсса аьралий иширттаву гьуртту хъанахъиминнал кулпатру барча бунни уттигъанну зун бивкIсса «Мариян» центрданий.
Мероприятие дайдишин хьхьичI хъамаллуран ккаккан бунни центр. Хьунабакьаврий бия жяматийсса ккураннал, МахIачкъала шагьрулул администрациялул, паччахIлугърал органнал вакилталгу. Аьралитурал хъами барча баву бакъагу, шикку гьаз бунни ми кулпатирттал агьамсса масъаларттугу.
«ХIакьину жу хьунабавкьуру аьралитурал хъаннищал, вай барчагу буван, вайннун жува цала чIарав бушивугу ккаккан буван. Талаталтрангу кIулну бикIан аьркинссар цалва кулпатру къулагъас дакъа къабитантIишиву, буван аьркинсса кумаг бувантIишиву», – увкунни «Единая Россиялул» хъаннил ккурандалул координатор Елена Ельниковал.
Хъаннин пишкаш бувна тIутIал кацIругу, «Дагъусттаннал бусаларду» тIисса турагентствалул чулухасса сертификатругу – щалва кулпатращал Дагъусттаннай чунмай-бунугу экскурсиялий буккансса.
Дагъусттаннал Культуралул министерствалул ккаккан дурна ххуйсса концерт.
