[dropcap]Н[/dropcap]иттихъал байран кIицI ларгунни вай гьантрай ЧIяйннал шяраваллил магьирлугърал къатраву. Му кьини кIицI лагаврил сиптачину хьунни шяраваллил магьирлугърал къатлул каялувчи СалихIат Алхасова. Байрандалун хасну чIюлу бувну бия хъун бакъасса зал. Ниттихъал байрандалийн оьвкуну бия оьрчIан кIулшивуртту дуллай хъунмасса захIмат бивхьусса ЧIяйннал школалул учительтурайн ва дуклаки оьрчIайн.

[dropcap]М[/dropcap]ероприятие дайдихьлай, ниттихъул ва душру барча буллалисса ихтилат бувна Салих1ат Алхасовал. Ванил дуклаки оьрчIахь бувсуна байрандалул тарихраятугу.
– Ххирасса ниттихъул, барча дуллай буру зул байран, чIа тIий буру цIуллушиву, талихI, тирхханну. Зула оьрмулуву ккарксса захIматшивуртту, пашманшивуртту хъамаритан дансса ххаришивуртту дияннав ттиния тихуннай зул ялун, – увкуна ванил.

Хъирив ниттихъул, душру барча буллалисса ихтилат бувна ЧIяйннал школалул учительтурал Фатима Айдаевал ва Зульфия Аьбдуллаевал.
Ниттихъан хас бувсса шеърирдугу бувккуну, балайрду увкуна дуклаки оьрчIал.