ДакIнил щавулий дирхьусса ка

Хъаннил байрандалул гьантрайн тIайла дарцIуна Ккуллал шяраватусса МахIмуд Чаннановлул Украиннаву хасъсса аьра­лий иширттаву чувшиврий жан дуллуну шин хъанахъисса чIун. Ванал ниттил Шамсият Оьмаровал шинайн зикри бишин, дуаь дуван цилла къювулул ссурваврайн, арсру аьрай ливтIусса ниттихъайн оьвтIисса хавар шайхту, Мариян Илиясовал цIанийсса «Дараччи» клубрал хъунмур Гульшан Хасаевал хIукму бувна клубрал чулуха Шамсиятгу, ва кьини ванил Каспийск шагьрулийсса ужагърайн бавтIсса цайми лакку ниттихъулгу барча буван куннасса даву дуван.

«Жура цимиллагу тикрал дувару халкьуннал шаэр Фазу Аьлие­вал, «ккулла щийн битарчагу, ниттил дакIницIунни щайсса» тIисса калима. Буниялттунгу, Украиннаву аьралий ишру байбивхьуния шийнмай ниттихъал дакIру къювулий дур. Жу хIакьину, жувагу зул дардирал, зул къювулул чIарав бушиву ккаккан буван, зул чIарав щябикIан бувкIру, мудан зул чIарав буссару», – увкуна Гульшан Хасаевал.

Ванил лакрал виртталсса ниттихъахьхьун буллуна конвертругу.
«Ттул дунияллий дуссарагу хъус-ххазина ва арс ия. Кьуния цара шинаву лавгунни дунияллия, цамур лякьлул оьрчI ттул бакъар, я МахIмудлун щар дуцинсса кьисмат къавхьунни, Аллагьнан ва ттунма кIулну яхI буллай бура, ттула яхI бусса оьрчIал аьпалул хIурматран. Ва кьини ттуйн дуркния шийнмай ттул чIарав бавцIуну, ттул щавулий цIимилул ка дирхьуминнавух «Дараччилул» душру бур, на зуйн барчаллагьрай бура, дуаьрдай бура», – увкуна Шамсиятлул.
Аьрасатнал Виричу Нур­махIаммад ХIажимахIам­мадов­лул ниттил Сапижат Мазаевалгу кIицI лавгуна «Дараччилул» къулагъасрахлу дакIнийхтуну барчаллагьрай бушиву.