Мартрал 2-нния апрельданул 12-нин МахIачкъалалив дайдирхьуссар «Дагъусттаннал композитортурал музыкалул панорама» тIисса цIанилусса Республикалул VI фестиваль.
[dropcap]В[/dropcap]анил сакиншинначину бур Дагъусттаннал паччахIлугърал опералул ва балетрал театр. Фестиваль хьунтIиссар ДР-лул Культуралул министерство чIарав бацIаврийну ва Аьрасатнал Композитортурал союзрал Дагъусттаннал отделениялул гьурттушиндарайну.
Ванил сакиншинначитурал агьаммур мурад бур республикалул композитортурал творчество машгьур даву, дур авадансса программа.
Мартрал 2-нний, фестивальданул цалчинсса кьини, Оьруснал театрданул хъунмур залдануву, ккаккан бувантIиссар ретро зумунусса шоу-балет «Вернисаж», СССР-нул халкьуннал артист Мурад Къажлаевлул музыкалухунсса, Аьрасатнал Федерациялул лайкь хьусса артист Муса Оздоевлул постановкалийнусса.
[dropcap]Ф[/dropcap]естиваль наниссаксса гьантрай ккаккан бувантIиссар оьрчIансса спектакиллу: Аида Жяъпаровал музыкалийнусса опера «Дюймовочка», Рамазан Фаталиевлул музыкалийнусса магьа «Навруз». Мукунна хьунтIиссар Республикалул Опералул ва балетрал театрданул хорданул, Халкьуннал инструментирттал оркестрданул, Дагъусттаннал паччахIлугърал Т. Мурадовлул цIанийсса филармониялул камерный оркестрданул концертру ва цаймигу шадлугъру.
ДайлитIунтIиссар фестиваль апрельданул 12-нний хъуннасса гала-концертрайну. Шикку Опералул ва балетрал театрданул оркестрданул, хорданул ва солистътурал щаллу бувантIиссар жулва классиктурал ва ттизаманнул автортурал музыка: Готфрид ХIасановлул, Наби Дагировлул, Сергей Агъабабовлул, Мурад Къажлаевлул, Ширвани Чаллаевлул, Рамазан Фаталиевлул, Гюли Камбаровал ва м.ц.
