Ватан дуруччултрал кьинилун хасну вай гьантрай Лакрал райондалул тIайла бувккунни гуманитар кумаграл ирглий­сса «Газель». 

Аьрайн кумаг батIаврил сиптачи хьунни райондалул бакIчи Юсуп МахIаммадов. Кумаг батIавриву хъуннасса гьурттушинна дурунни Гъумучиял кIивагу детсадрал, кIулшиву дулаврил идарарттал, шяраваллал администрациярттал. Дуклаки оьрчIал хIадур дурну дия аьралитурал дакIурдивун гьавас бутансса барча бавуртту.
Аьралитал ххари шай ватанлувтураясса ссаламрал чагъарду  бувкIукун, хаснува дуклаки оьрчIаятусса.
ОьрчIал бавтIун бия ссайгъатирттал 30-нниха ливчусса къуршив. Шяраваллал администрациярттал хIадур дурну дия 100-сса килограмм кьаркь дикIул.
Райондалул администрациялулгу миннул ялун ххи дурунни бытовая химия.
Цинявппагу ялугьлай бур аьра­литал ххувшаврищал цIу­­ллуну-сагъну жула ялун бу­чIа­ннин.