Ватан дуруччултрал кьинилун хьунин Лакрал райондалул администрациялий хьунни СВО-лийн мобилизовать бувминнал кулпатирттащалсса хьунабакьаву.

Микку гьуртту хьунни Халкьуннал Мажлисрал депутат Марат Илиясов, райондалул бакIчитал, идарарттал каялувчитал, СВО-лий гьуртту хъана­хъисса уссурвал ХIусайн ва Мурад Муслимовхъул.
Райондалул бакIчи Юсуп Ма­хIаммадовлул, бавтIминнахь ялун нанисса байрангу барча дурну, бувсунни мобилизовать бувминнал кулпатирттан буллантIий бушиву гьарца чулухасса кумаг. Ххигу бунни  муниципалитетирттай сакин бувну бушиву мукунсса кумагру буллансса фондру «#МЫВМЕСТЕ» тIисса. КIицI лавгунни цува мудангу хIадурну ушиву мобилизовать бувминнал гъанчувнащал хьунаакьин, миннал буруккинттах вичIи дишин ва бюхъайссаксса миннал мурадру щаллу бан.
– Жула оьрчIру биттур буллай буссар Ватан дуруччаврил ххуллийсса цала бурж. Гьай-гьай, жула ялун дуркIун дур захIматсса чIун. Амма  жунма багьлай бур, циняв цачIун хьуну, СВО-лий гьуртту хъана­хъиминнал кулпатирттал чIарав бацIан. Мунил цIанийссар ва хIакьинусса хьунабакьавугу. Зуща бюхъайссар, ламус къабувну, зула мюхтажшиндарал ялув ттучIан буххан, – увкунни Юсуп МахIаммадовлул.

Ва хьунабакьаврийгу Юсуп МахIаммадовлул ва Марат Илиясовлул мобилизовать бувминнал кулпатирттан бунни арцуйнусса ва сурсатирттайнусса кумагру.
Ахирданий Гъумучиял школалул дуклаки оьрчIал дурккунни Ватан дуручлачиминнан хас дурсса назмурду, увкунни балайрду. Шеъри бувккунни мобилизовать увсса СВО-лул гьур­ттучи Нариман ХIусайхановлул душнил Латифалгу.
Мобилизовать бувминнал мачча-гъанминнал барчаллагь увкунни райондалул бакIчинахь цахра дуллалисса къулагъасрахлу.