Аьрасатнал цинявппагу школарттай кунна, ва нюжмардий ЦIуссалакрал райондалул школарттайгу хьунни «Агьаммуниясса ихтилатру» тIисса классрал ссятру.
Вай гьантрай ЦIуссалакрал 1-мур школалий хьусса классрал ссят дия Ватан дуруччултрал кьинилун хас дурсса. Дарсирал мурад бия дуклаки оьрчIан бувчIин баву паччахIлугърал мюхчаншиву дуруччин ярагъуннил гужирдахь цуксса бияла буссарив. Школалул учительтурал бувсунни Аьрасатнал тарихрал савлугърая, ирсирай нанисса жула халкьуннал къучагъшиврия, жучIавасса ттизаманнул ярагъунния. Бувсунни хасъсса аьралий операциялуву гьуртту хъанахъисса школалул выпускниктурая. Гьарица классраву хьунни ватандалухсса ччавриясса, аьралий бурж бартбигьавриясса ихтилатру. ДакIнийн бивчунни 1999 шинал ЦIуссалакрал аьрщарай хьусса дяъвилул ишру, тай иширттаву чувшиврий жанну дуллусса РОВД-лул зузалт. Ихтилат хьунни Донбассрал агьлу буручлачисса хасъсса операциялуву гьуртту хъанахъисса райондалиясса аьралитурая.
