Циняв чIуннардил ва халкьуннал шаэр

Каспийск шагьрулул 3-мур школалий хьунни халкьуннал шаэр Расул ХIамзатов дунияллийн увккун 100 шин шаврин хас був­сса мажлис, «Поэт всех времен и народностей» тIисса цIанилу.

Ва хIадур бувну бия школалул библиотекарь Гъумучатусса Саидат Шяъбановал. Шадлугъран лавхьхьуну школалул актовый зал хIадур бувну бия сурат дишаврил дарсирал учительтурал – ГьунчIукьатIрал шярава­сса Камила ХIажиевал ва Уручуллал шяравасса ПатIимат Иб­рагьимовал.

Дуклаки оьрчIал дурккуна шаэрнал назмурду, ккаккан бувна ванал произведениярттайн бувну хIадур бувсса сценкартту. Дуклаки оьрчIал мукунма увкуна балайрду, дуруна къавтIавуртту.
Махъру лавхъуна школалул директор Мадина Агъаевал, хъамаллурал. Вара чIумал школалий най бия шагьрулул школарттал библиотекарьтурал семинаргу. Ванийн бувну шадлугърал хъамаллуравух бия шагьрулул цайми школарттал библиотекарьталгу.