Ватандалун аьркинсса давурттал усттартал

ХIажи АьвдурахIманов

Ларгсса шинал ахирданий МахIаммад ХIажиевлул цIанийсса заводрал кIицI ларгунни 90 шинал юбилей. Завод – му хьхьичIва-хьхьичI зузалтри, цимирагу тонна дусса оборудование зузи дувансса бакIгу, каругу дусса, билаятрал мюхчаншиву дуруччавриву бунияласса бутIа бихьлахьисса. Заводрал тарихгу чичайсса вайнналли. Ва заводрай хIакьину зузисса лакрая чичлай жу байбивхьуссияв ларгсса шинал ахирданий. Чикъавчуну ливчIминная тIурча, Ватан дуруччайминнал кьинилуцIунгу бавхIуну буслай буру.


Къуруллал шяравасса ин­женер-технолог ЯтIуев Султан Сулайманнул арс ур М. ХIажиевлул цIанийсса заводрал зузалтравугу, шикку зузисса лакравугу, заводрал цехирдал начальниктуравугу яла жагьилма. Оьрмулул 17 шинаву увкIун ур Султан заводрайн. Ва ур 17-мур цехрал начальник.
Султан увну ур Щурагь 1987-ку шинал. Шагьрулул 2-мур школагу къуртал бувну, увххун ур ДГПУ-лувун, лавсун бур педагог-психологнал пиша. Заводрай зий ур 2005-ку шиная шийнай, 2008-ку шиная шихунай – отделданул начальникну. ЦIанасса чIумал Султан дуклай ур ДГТУ-лувугу. Заводрайсса цалла агьаммур даврицIун Султан хьхьичIунну биттур дуллай ур жяматийсса давугу. Ва хъанай ур заводрал Жагьилтурал советрал председательгу, щалагу Аьра­сатнал халкьуннал фронтрал жяматийсса партиялул Да­гъусттаннайсса отделениялул членгу. Заводрай ДР-лул Жагьилтурал иширттал министерствалущал цачIуну ванал дурссар пишардал ярмаркIагу (WordSkills).

Гъумучатусса Чалавиев Исрапил МахIаммадлул арс хъанай ур ва заводрал аксакалтуравасса ца. Гъумук увну, школагу къуртал бувну, Ибрагьим увххун ур Москавлив Бауманнул цIанийсса институтрал приборостроительный факультетрайн. Амма, ва къуртал бан хъирив къалавну, Аьралий буржгу лавхъун, увкIун ур заводрайн 1972-ку шинал токарьну.

Камил ХIажиев

Айгунов Ажуб Ибрагьимлул арс увну ур ЦIуссалакрал райондалийсса ЦIуссаккуллал шяраву. Аьрая зана хьуну, хьхьувайсса отделениялий Механический техникумраву дуккавугу дурну, 1987-ку шиная шийнай зий ур заводрай – 18-мур цехраву. Зузиссаксса шиннардил му­тталий ванай аьй дурсса, хъуними ваная рязи бакъасса кIану хьуну бакъар. Рулевой машинарттан­сса пуржинартту буллай, итадаркьусса продукциялул гравировкалулсса буллай, яни гьарца затрайн цийнна-цийнна лачIун дувайсса табличкалулсса, маркировкалулсса, клеймордалсса буллай, зий ур ва. Ва ур станокирттал оператор. Вайксса шиннардий давугу канилух дурккун, зий ур Ажуб бигьану.

Увурдал шяравасса Ибрагьимов ХIамзат Мирзал арс заводрай зий ур 50 шинал лахъишиврий. Ва ур токарь. ХIамзат, МахIачкъалаллал шагьрулул 6-мур школалий 8 классгу бувккуну, 1973-ку шинал увкIун ур шиккун. Ученикну цува увкIсса 18-мур цехравува зий ур ттигу. Заводрайн увкIун махъ къуртал бувну бур Механический техникум. Ванал дуллай ур судостроительный промышленностьран аьркин шаймур (щинайх бачайсса хъуни жамирдан аьркинмур). Хаснура цIанасса санкциярттал чIумал шикку гьарзат цалла дуллай бур. Ванал канила дуркмур най дур гихуннай Санкт-Петербург, Калининград, Ашттархан ва цаймигу шагьрурдайн. ЗахIматшиву му дур тIий ур ХIамзат, цIанасса чIумал жагьилтал заводрай зун най бакъашиву, цалва кIану бугьансса цайми бакъашиву. Ванал нину-ппу Залму ва Мирзагу зий бивкIун бур шиккува, мукунма – ссу ва уссугу.

Цалчинмур ЦIувкIуллал шяравасса Кьурбитаев Алхас Сулайманнул арс ва заводрай зий 10 шин хъанай дур. МахIачкъалалив школа къуртал бувну, Педагогикалул институтраву индустриально-педагогический факультетгу бувккуну, зий ивкIун ур колледжраву мастерну, школалий захIматрал дарсирал, черчениялул учительну. «Авиаагрегат» заводрай зийгу шинну дурну дур. Ва завод лавкьуну махъ, Москавлив лавгун, пассажирский вагонну бакьин бувайсса «Войтовичлул цIанийсса» заводрай зийгу ивкIун, яла увкIун ур М. ХIажиевлул цIанийсса заводрайн. Шикку Алхас ур слесарьну, аьралий хьхьирил ва граждан жамирдал деталлал ялув бацIаврил, вай датIаврил давуртту дуллай.

Ва заводрай зий ца шин шавай дур ЧукIуннал шяравасса ХIажиев Камил ХIажинал арснал. МахIачкъала шагьрулул 8-мур школагу къуртал бувну, Камиллул бувккуну бур Механикалул техникум, Политехнический институт. Зий ивкIун ур «Авиаагрегат» заводрай, «Азимутрай», инженер-технологну. М. ХIажиевлул заводрай ва зий ур хъунама технологнал отделданий инженер-технологну ва инженер-программистну, станокирттансса программартту дуллай.

Ажуб Айгунов

1989-ку шиная шийнай зий ур шикку Къуруллал шяравасса Турланов МахIат Аьвдулкариннул арс. Школагу къуртал бувну, аьралий буржгу лавхъун, увкIун заводрайн, зий ур шикку прессовщик-вулканизаторщикну.

1982-ку шиная шийнай зий ур заводрай ЦIийшиял шяравасса Халилов Зайнуллагь Юсуплул арс. Лаккуй школагу къуртал бувну, ватандалул хьхьичIсса цалва буржгу лавхъун, увкIун ур шикку зун, зий ур 2-мур цехраву наладчикну.

Буршиял шяравасса Аьбдуллаев ХIажимихIаммад ХIус­­маннул арс, 2-мур цехрал слесарь-сборщик, зий ур шикку 1977-ку шиная шийнай.

Убурдал шяравасса Аьвду­рахIманов ХIажи АьвдурахI­маннул арс заводрай зий ур 1978-ку шиная шийнай. Гъумук 8 классгу къуртал бувну, армиягу лавхъун, увкIун ур шиккун. Ва ур ЧПУ-лул (числовое программное управление) оператор.

Махlат Турланов

ЧукIуннал шяравасса ХIу­сайнов Мурад Шарапуттиннул арс, шагьрулул 34-мур школагу къуртал бувну, Политех институтгу бувккуну, личIи-личIисса кIанттурдай зийгу ивкIун, 2017-ку шинал увкIун ур М. ХIажиевлул цIанийсса заводрайн. Ва ур электроникалул отделданул инженер-электронщик.

ШавкIратусса Аьлиев Шарип АхIмадлул арс зий ур 1981-ку шиная шийнай. Зий унува къуртал бувну бур Механический техникумгу. ХьхьичIва шикку зий бивкIун бур ванал нину-ппугу, кулпатгу, кулпатрал ппугу. Шарип ур токарь.

Хlамзат Ибрагьимов
Исрапил Чалавиев ва Шарип Аьлиев

Вай бакъассагу, заводрай ялагу зий бур къачансса лак: Ххюлуссуннал шяравасса МахIаммад Аьбидов (хъунама технолог), Къяннал шяравасса Михаил Оьмаров (проектирдал каялувчи), Ваччатусса Кьурбан Кьурбанов (сверловщик), Буршаятусса Камил Гурбанов (слесарь-сборщик), Щаратусса Шамил БахIаммадов (цехрал формировщик), Бархъаратусса Ибрагьим Къаллаев (лекальщик), Вихьлиятусса Аьлил ва ХIажи Чупановхъул, ГьувкIратусса ТIагьир Аьбдуллаев (тIаннул усттар), Гъумучатусса Аьбдул Халилов (бюрорал начальник), КIилчинмур ЦIувкIратусса Сайпуттин ЯхIияев (инженер), Аьхъа­ратусса Казим Гьашимов (складрал хъунама) ва цаймигу.

Ватан дуруччултрал кьинигу барча тIий, чIа тIий буру ва заводрай зузисса жула лакрал чиваркIуннал кулпатир­ттан нахIушиву, вайннал давриву хьхьичIуннайшивуртту. Зу дуллалимур Ватандалун ва ванил инсантуран паракьатсса дунияллий дакъа ишла дуллан къабагьаваннав.