«Вирттаврал чарххана»

АбутIалиб Гъапуров

Ттул дакI дустуран цачIуссар

Балики ттуйн
Хъап учирча
Нач дакъасса
БивкIулул,
Къадулунна
На ттула дакI,
ТтаркIру дакъа,
Мунихьхьун.
На ттула дакI
Кьаританна
ВирттаврачIа
Гьурттуну,
Абадлийсса,
Чанна лавхъсса
Оьрмулуву
Илкинну.
Харж буванна
На ттула гуж
ЦIу оьрмулун
Савлугъран,
Тархъан хьусса,
ТалихIрайсса
Циняв ттула
Дустуран.

Абакар Мудунов

ХIалал ити

Дяъвилий ккуллалул
Нажагь утарча,
Так ца вийн оьвтIира
На ивчIантIисса.
Агар ссихI дуккансса
ХIал бухлагарча,
Ина дакIнийнара
Жан дуллантIисса.
КIулли аьтIуншиву
ЩябивкIун ясрай,
Мукьал шюшинсса ххай
ДакIнил дардисан,
АьматIра, аьматIра,
Ххирай, аьматIра,
Вил мукьал кIилчингу
На ивчIанссара.
Хъамакъаитарча,
Ттул вийн аманат:
Ябилути зунттах
Лагабургъищал,
КIиккур ттул оьрчIшиву
ТIуркIу тIий ларгсса,
КIа чIумалла ина
Ччан хьуну бивкIсса.
АьматIра, аьматIра,
Ххирай, аьматIра,
Вил мукьал кIилчингу
На ивчIанссара.

Бадави Рамазанов

Урша гъавгъ душ

Ттул дуснал яруннил жавгьарду бакъар,
Мудан ганал хьхьичIух дур цIаннал пардав,
ЩяивкIун щугълурдай гьан дай кьинирду,
Ягу занан икIай хIисаврал хъирив.

Хьунаавкьнал цахьва «ивзрав» учирча,
Ка дугьан тIитIин дай хьхьичIуннай кару.
КIичIиравух найни чару бахчирча,
Чулийнмай палцI бувай, аьсав къуч дурну.

Ганал чIиви оьрчIгу карав увцуну,
Цал-цал щяикIара на ганал чIарав,
Яла, ганал кунма, яру лавкьуну,
Лагара оьрчIнийсса оьрмулул хъирив.

Ттун ккаккай чIаххувоьрчI
бярнил ккурккайсса,
ТIартIсса хIажакрава никру чIалайсса,
Ккаккай, урша гъавгъун, аьтIисса душгу.
Душнин къащи дуллай, къавтIисса оьрчIгу.

Ккаккай кIичIираву, маразгу бавхIун,
Ттула дус личIлулну пагьламан лахълай,
Ягу, чарттаракIи кIунттил бувгьуну,
Левххун нани хъатIу бивтун щяв бутлай.

Ттун ккаккай школа, оьрчIру, тIуркIурду,
Мужаллатру тIартIсса жула луттирду,
ЦIунил дакIнийн багьай парталул цIаний
Дус ва нава бивсса, сумкарду бишлай.

Амма ляличIину дакIний дур кьини
АцIилчинсса класс бачIва ливчIусса,
Жула дус фронтрайн нанисса кьини,
Жагьилтурал дурцIун, пургъун нанисса.

Арснахь ххуллухъин тIий дия нинугу,
Шавхьсса ккунукругу бувгьун кIунттиву.
Урша гъавгъсса душгу ккавккуна гикку,
Карщул къатта бихьлай ганал жипливу.

Ганияту мукьах ттун къаккавккуну,
Ттул дуснал шанна шин фронтрай дуруна.
Яла аьсавращал занагу хьуну,
Щарнил агьлу ганан чIуний бувчIуна.

Так цала ниттил чIу ганан къабавна,
Ттул дус зана хьуннин га къалирчIуна.
Урша гъавгъ душнищал архIал лавгуну,
Ххал дурна ниттил гьав канил ках дурну.

ЦIанагу ттул дус ур канил ках-шах тIий,
Цала арснал сиппат цукунсса дурив.
Бунугу къатлуву чирахъ пар-пар тIий,
Ганал хьхьичIух гара дур цIаннал пардав.

Арулла нааьна аски душманнан,
Ттул дуснайн га кьини цал дуккан дурсса.
Арулва барчаллагь урша гъавгъ душнин,
Дуснайн кьини дуркний, чIарав бавцIусса.

Юсуп Хаппалаев

* * *
ХIалал хьуннав, аьзиз,
Ттул лакку нину,
Ина буллу ккукку
Лакрал оьрчIаран,
Душманнал хъазамрай
Хъуру бивзуну,
Хъунисса вирттаврал
ЦIарду цал ларсъсса!

Барчаллагь хьуннав вин,
Хан зунттал щарссай.
Хумар тIутIул яру
ПIял чин къабувну,
Ватандалул ялун
Кьини дурккукун,
Кьини лахъансса яхI
ОьрчIан буллусса!

Мирза МахIанмадов

Оьрму

Оьрмулул нуз тIиртIуну,
На хьулувух уххайхту,
Гьан багьуна дяъвилийн
Талан так оьрмулухлу.
Оьрмулухлу инсаннан
Бувагу цал булайсса,
Оьрмулухлу дахьа ттун
Цил тIин-тIааьн кIул хьусса.

Ттул дарвачирайх ришлай,
Най ия душман гужну,
Ник рищун дан кьасттирай
Ватан ва тархъаншиву.
Дакъая къаучинна
Рирщумур цIун къахъанай,
Угь тIий дия аьрщира,
Душманнал ккуччу дуллай.

Гьич, ниттил ккукку кунна
Дурвавли нахIусса зат?
Гьич тархъаншиву кунна
Дурвавли ххирасса зат?
Ватан мютIи шайххивав
Муххайн ягу ккуллардайн,
Тархъаншив дагьайххивав
Зулмулул хьхьичI никирттайн?!

Гьаз хьуна буттал улклул
Щалвава агьлу-авлад, –
Ливхъуна жул оьрмулул
БакI кьукьин ччисса жаллад.

Ливхъуна, ццаххандарай,
Никъурал хьхьа буцанцIа.
Оьрму бия хъирив най
Ххувшаврил ттугъ бищунцIа.

Чивчуссар ттуй ккуллардах
Оьрму уттавашиву,
ДирчIан къашайшив турлих
Халкьуннал тархъаншиву.
Чивчуссар оьттух нагу,
Дунияллун кIул буллай,
ХIакьсса, уздансса оьрму
Бушиву ттул аьрщарай.

МахIаммад-Загьид Аминов

«Ттул нину» тIисса поэмалува

ЧIун архIал оьрчIавух тIуркIу тIий уна,
Пар куну лавгунни оьрчIшиврул гьантри.
Лултту дирзсса мучIал дурухлу кунна,
ЛирчIунни дакIниву кьурчIисса ттангъри.

Циваннив, аьгу тIий, на ххира айвав
Бургъилу щядиркIсса чIаххуврал къарил.
Ттун ччяни дурчIунни гай мукьал савав:
Ятин ххира айсса ивкIун ур ганил.

Ятин! Бутта акъу. Царив, кIиярив?
Ци тахсир хьуссар ттуй, на ятин уван?
Агь, къабучIиссиявкьай ва дунияллий,
Жулгу ппухъру буну, жугу шадну хъян?

Ттуршая був чугу хъюву кьабивтун,
Ларгунни оьрчIшиву хъув чIаллу батIлан.
Кьавкь ччатIул парчагу хьуву лабивтун,
Ларгунни маршраву бярч канаки бан.

Чунна тIий, чунна тIий,
оьрчIшиврухь цIухлай,
Къапулухун увккун, мюршну ябитан:
ДарцIуну дур нину, хъирив дуруглай,
Мукьал ккузригу бур ххарисса иттав.

Ххарину дур нину, на хъуна хъанай,
ОьчIарарайн чIила щун дуранугу.
Пашманну дур нину, на хъуна хъанай,
Ппу лавгсса дяъвилул чIу бухлавгнугу!

Салимат
Кьурбанова

Ххуллухъин баннав

На вин дуллуссия,
Вин дуллуссия
Интнил шадшивугу,
Ххуй тIутIал кьанкьгу.

На вин дуллуссия
Бургъил тIинттугу,
ТIинттуну пар тIисса
Ттула яругу.

Вил хьхьичI, майдан куна,
ДакI тIиртIуссия,
Зунттуксса лахъ увну,
АцIан увссияв.

На вин буллуссия
ЦIан хьхьуну цIубарз,
Вин ххуллу къабяйкьин
Буттахъал тIювайн.

Багьунни вин ачин –
Ххуллухъин баннав!
Ххуллул гьалмахчуну
Ттул дакIгу хьуннав!