Юсуп МахIаммадов, Лак­рал райондалул хъунама:
– Президентнал балжийну бувсунни хасъсса аьралий ишру байбишинсса багьана-сававртту цукунсса диркIссарив. Жува пахрулий буссару чувшиврий, кьянкьану бавцIуну, аьралий масъа­лартту бартбигьлагьисса жулва вирттаврая. Ва къабигьасса ппурттуву балаллул жулва агьали лагма лаган бунни, гъан бунни. Агьалинал цашиву, хьхьичI ирглий, аьлтта чIалай дур аьрайминнан ва аьралитурал буллалисса кумаграйну. Хасъсса аьралий ишру байбивхьуния шийнмай талаталтран аьркинмур датIаву аглан хьун къариртунни, гъили­сса лаххия, дука-хIачIанмур, аьркинмур ххилай бур. Президентнал чIурчIав дунни социал даража гьаз буваврихгу хъуннасса къулагъас душиврий, цIу-цIусса школартту ва оьрчIансса багъру, культуралул, цIуллушиву дуруччаврил учрежденияртту буллай бур, бакьин буван багьайми бакьин буллай бур. Ва кIану хIисавравун лавсун, жул райондалийгу сайки циняв школартту бакьин бувссар , оьрчIансса цIусса багъ буллай бу­ссар. Ва ялагу, Аьрасатнал агьалинан ххуйсса оьрму дузал бувансса программардаягу бувсунни Президентнал. Ларайсса кIулшиву дулаврил системалуву дахханашивуртту дуван багьлай бушиврийгу авцIунни.

Сулайман Рамазанов, ЦIуссалакрал райондалул хъунама:
– Президентнал чIурчIав дунни хасъсса аьралий иширттаву гьуртту хъанахъими чувшиврий ва сивсуну Ватандалул мурадру буручлай бушиврий ва миннайн барчаллагьрай ушиврий. Бувсунни вайннал чIарав бацIаву мурадрай дуллалисса давур­ттая, хасну аьрай ливтIуцириннал кулпатирттан кумаг буллан­сса паччахIлугърал фонд хIасул дувантIишиву, циняв аьралитуран дачIи шинал лажиндарай цал бигьалагансса, 14 гьантлийсса, отпуск булавантIишиву, ххуллийхмур чIун хIисав къадурну. Жулва муттаэтурал санкциярдал къатIри бизларчагу, Аьрасат ласу-ка бувхIуну къаливчIунни. Ларгсса шиналгу, гьашинугу жува агьам­сса объектру буллай буру, ххуллурду буллайгу, бакьин буллайгу буру, коммунал инфраструктура ххуй дуллай буру. Социал выплатарттая захIматсса тагьарданувун багьминнан кумаг бур. Жува хIакьину Ватан дуручлай буссару, так жул ЦIуссалакрал райондалия СВО-лул зоналий 300 талатала уссар: контракт цIакь дур­ссагу, аьрайн бувцуссагу, цивппа хушрай лавгссагу аьмну хIисав бувну. Жулва талаталтран федерал кумаг буссар. Ва кумаграхлу Аьрасатнал Президентнайн барчаллагьрай ура, талаталтравун Донбассрал агьали буручлансса гъира бутлатиссар, миннан аякьа асар хъанахъиссар. Жувагу кIани-кIанттурдай хIарачат булланну Президентнал хьхьичIун лавсъсса мурадру сантирай бартбигьлан.

Шамил Рамазанов, Ккуллал райондалул хъунама:
– Президентнал Рисала жува дайдирхьусса давуртту бакIуйн дуккан дувантIишиврий дакI дацIан буллалисса дия. Тагьар, гьай-гьай, бигьасса дакъар билаятрай, дакъанугу, мудан кунма, хьхьичIун лавсъсса масъалар­ттавух дия социал тагьар. Гьаннайсса, инсангу, ганахасса аякьагу хьхьичI ххуттай. Президентнал программалуву райондалул экономика, социал тагьар сантирай ва лябуккулий хьхьичIуннай хъананшиврул кабакьу бувансса кIантту бия. ДакI дарцIуну ура, жува цахьуну, дакIругу, пикригу ца бувну къуццу тIутIаврийну жува духхинтIишиву, билаятрал бакIчинал хьхьичI ххуттайн лавсъсса масъалартту, билаятрал лагрулийсса бикIу, райондалул лагрулийсса бикIу, бартбигьинтIишиву. ЦукунчIавсса санкциярду ва бурмарду чIувин буллалавуртту жухунна къадахчинтIиссар, Аьрасатнал тарихрава исватну чIалай буссар къадахчинтIишиву. Жулла цашиврул, ссаву ци буссарив бувчIлачIаврил жунма кумаг бувантIиссар ччими иширттава узданну буккан. Жува мадад къабулунтIиссар. Мукунни бивкIсса тарихрал лахъишиврий, яхI буллай аьдатссару, уттигу мукунма яхI буллалиссару ва буллантIиссару.

Назим Баламирзоев, ДГТУ-лул ректор:
– КIулшивуртту дулавриву «Болонская системалийн» бучIаврил хIасиллу жунна ччикунсса къархьунни, учиннуча, жуйнна къадаркьунни му «чухъа». ХьхьичIара жучIара диркIсса кIулшивуртту дулаврил системалийн занабикIарча, жулва билаятрал лаваймур школалул потенциал багьайкун ишла буван ва бартбигьин хьунссия. Президентнал кIицI лавгунни аьдатрайсса системалийн бучIаву хIаллицIухсса дикIан аьркиншиву, цIанакул дуклакиминнал ва вузру къуртал бувминнал ихтиярду дуруччинсса даражалийсса. Президентнал хьхьичI бивхьусса масъалартту бартбигьиншиврул, вузирдаву гьунар бусса жагьилтал гьаз буллансса ва давурттал дузал буллансса шартIру дузал дуллан аьркинни. Чара бакъа ишла дуллан аьркинни кIулшивуртту дулаврил совет заманнал системалул дюрхъусса практика ва опыт.