Дагъусттаннал Миллатрал библиотекалуву хьунни республикалул Туризмалул министерствалул ларгсса шинал дурсса давурттал хIасиллу дуллалисса ва гьашинусса шинал дуван дакIнийсса давурттая бусласисса коллегия.
Министр Эмин Мердановлул кIицI лавгунни 2022 шинал туристътал республикалийн бучIаву 43, 7 процентрал гьаз хьушиву, туриндустриялул маэшатрая дучIаймур арулва миллиардраха лирчусса хьушиву, вай, 2021 шин хIисав дурну, 15 процентрал ххишаласса хъанахъишиву. Ванал бувсмунийн бувну, ларгсса шинал МахIачкъалаллал АхIмад-Хан Султаннул цIанийсса аэропортрал кьамул увну ур 2, 5 миллион инсантурал, вай хъанай бур 2021 шиналнияр 23, 2 процентрал ххишаласса. Бувсунни туризм гьаз дуваву мурадрайсса проектру бартдигьлагьисса шагьрурдан ва районнан субсидияртту буллушиву.
– «Туризм ва хъамал ххирашиврул индустрия» тIисса национал проектрал лагрулий 10 проект бартдигьин бювхъунни, туристътал гьантта бикIансса кIантту ххи бан хьунни, гьарзатгу хIисавравун ларсун, даву лахъсса даражалийн гьаз дувансса чаранну ляхълай буссару, – увкунни министрнал.
Ванал бувсунни шинал лажиндарай аглан къадурну най диркIшиву республикалул туризмалуцIун кабакьу бувансса рекламалул даву, так ца ларгсса шинал министерствалул 40 ярмукIалий, выставкарттай гьурттушинна дуршиву ва министерствалул цилла сипталийнугу дуршиву ярмукIартту.
2023 шинал туризмалул даву бюхъулий ва сантирайн хьхьичIуннай дуваву мурадрайсса проектирттавух кIицI лавгунни курорт «Къаякант», щалвагу Аьрасатнал оьрчIансса центр «Дагъусттан», Дарбантливсса бигьалагай кIанттурду, вайннувух – 6,7 миллиардрансса 6 инвестициялул проект дагьлагьисса «Каспилул зуманицIсса кластер». Гьаз бувна коллегиялий Хунзахъиял райондалий туризм хьхьичIуннай даву мурадрайсса масъаларттугу, карунних бартбисуртту щащай даву гьаз даврил масъаларттугу.
