Бутталгу, арсналгу гьунарду цасса бия

КIиягу дакIнийн бичлай

Ттул ниттил ппу Кьурбан­махIаммад ва ниттил нину Гулмариян Хъусращиял шяра­ва­сса хъудугьул кулпатрава­сса, захIмат буллай, цала маэшатрайну кулпат бакI буккан буллалисса инсантал бивкIссар. КьурбанмахIаммад усттарну къалайчишиву дан кIулсса икIайва. Цувагу Хъун дяъвилия щаву дирну зана хьуну хъун хIал къавхьуну яла лавгуна.

Вайннал кулпатраву бия ххюва оьрчI, дузал бувсса бия так ца ттул нину ПатIимат. Дяъвилия махъсса ккашикалсса шиннардий, ласгу ялату лавгун, Гулмарияннул канихун багьну бия мукьва оьрчI. Гулмариян бия хъинну зирангсса хъамитайпа. Кьинибархан колхозрал давурттайгу зий, кIюрххи-кьуннил ичIаллил давурттив дуллай, захIмат буллай бикIайва. Тамансса шиннардий школалий уборщицанугу зий буссия.

Вайннал хъунама арс, ттул ниттиуссу, Камалуттин Кьур­банмахIаммадов чIивину унува музыка ххирасса, мунил чулухунай хъинну итххявхсса ия. Школалий дуллалисса цинярдагу мероприятиярттай гьуртту шайсса ивкIун ия. Шяраву Камалуттин хIала акъасса мажлис къашайва тачIав. ЧIивину унува лавхьхьуну бия Камалуттиннун мандолина бищунгу.
ЧIяйннал школалий 10-классгу къуртал бувну, ва дуклан увххун ур Пединститутравун. Му къуртал бувну махъ, бутта, шяравун увкIун, школалий математикалул дарсру дихьлай ивкIссар. Хъусращиял школалий Камалуттиннул дишайссия музыкалул дарсругу. Гьарца чулуха итххявхсса икIайва ттул ниттиуссу.

Ванал цалла ляхъан дайва макьаннугу, чичайва назмурдугу. «Культуралул лайкь хьусса зузала» тIисса цIагу Дагъусттаннай Камалуттиннул цалчинминнавух ларсъссар. Учай, цанниву гьунар буманал, гьарцаннуву буссар куну. Мукунсса ия жул Камалуттингу. Мяйжаннугу, ия гьунар бу­сса композитор, шаэр, балайчи ва куртIсса кIулшивуртту дусса учитель. ХIакьинусса кьини Камалуттин КьурбанмахIаммадовлул ляхъан дурсса чIяруми макьанну дур халкьуннал макьаннайн кIура дарну.

Лайкьсса ва ххаллилсса давуну хьунни Хъусращиял шяраваллил Культуралул къатлун Камалуттин КьурбанмахIаммадовлул цIа дизавугу.
Камалуттиннул кулпат Гугьаршагу уздансса, ххаллилсса хъамитайпа бия. Ирсирай нанисса духьунссия ванилмур инсаншивугу. Хъусращиял колхозрал председательну зий ивкIсса ванил ппу Буниямин Аминовгу, райондалий акъассагу, Дагъусттаннайгу хъинну бусравсса адамина ивкIссар. Камалуттин ва Гугьарша кIиягу, оьрмулия щакъаливххунма, 67 шиннаву дунияллия лавгунни. Вайннал дард-хажалатрайсса жун хъиннува кьувтIунни Камалуттиннул хъунама арс Рамил оьр­мулул дязанний жуятува лагавугу.

Аьпа биву, Рамилгу, бу­тта куна, гьунар бусса, гьарца чулухунай итххявхсса икIайва. ЧIюлу байссия ванал шяраваллил Культуралул къатлул мажлисру. Школалий дуклакийнигу Рамил хъинну сий дусса, учительтуран ва дуклаки оьрчIан ххирасса жагьил икIайва. Рамиллул хьхьичIунсса хIасиллай Хъусращиял школагу къуртал бувну, Дагъусттаннал шяраваллил хозяйствалул институтгу бувккуссар. Буттал зумуну Рамиллулгу мандолиналий, аккордеондалий усттарну макьанну руцайссия. ЛяличIисса такьвалий, багьан бувну, балайгу учайссия.

Махъсса шиннардий Рамил кьамул увну уссия Лакрал театрданувун. ЧIирисса чIумул му­тталий ва архIал зузиминнангу, тамашачитурангу ххира хьуну икIайва. Ванал чIивимур душ Дианавугу бур буттал кунмасса балайлул гьунар. Ххирассия Рамиллун, ванингу лахьхьин буллай, ичIува балайрду тIун. ХIайп, къаивтунни жул Рамил цанма ххира­сса кулпатрая, оьрчIая ва дакIнива нанисса шавкьирал гьунардая щалихханнин.
Соня Какваева