Гьарца кьини къачансса чIун лагай жулла ххуллийх, кIюрххил даврийн, ахттакьунмай махъунмай шаппайн, жулва иширттай чун-бунугу най. Ххуллийхсса чIумал жущава шай лагма-ялттусса тIабиаьтрай тамаша буллан, шагьрулул кIичIирттавусса инсантурал зана-кьулушиндарал хIисав ласлан. Укунсса чIумал хIасул хьу­сса асарду бучIину чIалан бикIай кув чIумал чагъарданийн ласунгу. Ай-балики, укунсса кIанттурдай жувагу жухва жува личIлулну буругаван, жунма жува цал ххишала бувчIин, чулуха чIалан.

Жула республикалул хъун шагьрулий махъсса шиннардий нажагь бувайсса марххалттанил кьини 44-мур маршрутрай нанисса маршруткалул щупирнал, кIа Сепаратор поселокрая айивхьуну, Редуктор поселокрайн ияннин кьацI къалавкьуна салондалувусса пассажирнал ва ххуллийх нанисса машинарттал занакьулушиндарая лахъну гъалгъа тIий. Ттул чIарав щябивкIсса хъамитайпалул, щупирная рязи бакъа, увкуна:
– Та инсан гъалгъа тIаврил увагу къауххайривав?!
Тарив аьркин бакъасса, тIайла бакъасса цавагу зат тIий акъая, учин ччимур, вайминнангу дарсну хьувча тIий, лахъну тIий ия. На кIа хъамитайпалухьгу учав, цал кьаивкIун икIарча, кIилчин, жулва инсантурал къуццу тIутIаврия уххаврил, цукунни кьаивкIун икIан, кIюрххия ахттакьуннин ванан цими журалул инсан бакIрайн агьлай акъар, жулва инсантал, мяйжаннугу, кувний бигьа ба­къасса бурхха, инсантуращалсса даву цурдагурив чувчIаврагу куклусса къадикIайхха, хаснура жучIара куну. Ванийн хъамитайпалул тIива:
– Укунсса даву ванал цалла дакъарив язи дургьусса, тти ссайнни гъургъу ккалаккисса, кIулхьунссия ва ци давурив, цува чун наниссарив?!
Нагу учав:
– Бюхъайхха ва даву цанна хъинну ччай язи дургьуну къадикIан, цIана зунсса кIанттурдугу къачIявусса бур­хха, бюхъайхха чара бакъул зий икIангу. КIюрххия ахттакьуннин вай ххуллурдайх заназисса ванаща кьаикIан шайссарив, кIюрххил даврийн, ахттакьунмай махъунмай, руль гьанагьи къабуллай, цимиягу инсаннал ялув жаваб къадуллай, укунма, бигьану, рахIатну щябивкIун нанисса ттунмагума ттулва лагма-ялттусса ца-цавай пассажиртурайнгу, чIавахьулттил гийх чIалачIисса цайми машинарттал щупиртурайнгу ссибизлай бикIайхха, – куну.
Ва кьини жул маршруткалул щупирнал гъургъу бувккуминнавух бия хьхьувайния кIюрххилнин буллай бивкIсса марххалтаниха машиналул дагьани дурарагу къачIалай ххуллийн бувксса душ-водитель. Мяйжаннугу, цукунни ганин марххалттанувун дахьларгсса дагьанттувух тиха-шиха нанисса машинартту ххал хьунтIисса. Вана укун­сса бур жулва Да­гъусттаннайсса чIявуми щупиртал: ай, балики, ци бурча, дагьанттувух за дурагу къачIалай ягу чанну чIалай духьурчагу, ци бурча, хьхьувай ца зукъазисса, ца лавхъсса фаралущал аьрххилий уккарчагу, агь, вагу цирича, тагу цирича тIий къуццу тIутIисса, ххуллий къулагъас къадувансса зат къабикIайшиву, ххуллул ваксса-таксса гъалатI хIалал къабитайшиву, ххюйлва цукуннугу бучIи хьурчангу, ряххийлчин цалагу, цайминналгу бакIурдийн бала буцин бю­хъайшиву хъамабитлатисса.
Щупирнал цинявннан баянну увкуна, цан гихун, хьхьичIун, чIу ххуйну баллай бакъарча, бацIан буван аьркинний, лахъну, баянну учира куну. Агь, вил къаттай, баянгу аьркинни ванал тIимур салондалувусса инсантуран, кув, цалва шаппа дивандалий щябивкIсса кунма, телефондалувух гъалгъа тIисса, кув, вичIавун чIутIру бувну, музыкалух вичIи дирхьуну нанисса. Яла-ялагур бусса, цахьва цала ягу цала чIаравманан баянну тIутIисса кунма, баллай-къабаллай бацIан бува тIий.
Щупирнан цан къабизави, ттунмагума ссибизай, бачIвасса кIантту бунува щякъабикIавай, щябикIи, цал ялув бакъавцIунма, тIисса щупирнахьгу, цIана ликкавай буру тIий, гьарца увххун ва увккун наниманахунгу бахчилай нузардичIа бавцIуминнайн. Ссибизай, бувккун бачиннин, забацIун бияннин кьагубивкIун, бувккун нанийни, щупирна­хьхьун азарда ягу кIиазарда къуруш дуллалиминнайнгу.
Ва сияхI гихуннайгу лахъи дуван хьунссар. Амма жуватувасса гьарцаннал пикри буван аьркинни уку-укунсса кIанттурдал ялув, жува, пассажиртал, чIявусса бухьурча, щупир ца ушиврул, ванан кIюрххилния хьхьувайнин гьарцаннахь паракьатну гъалгъа тIунсса, гьарцама ухIлансса хIал биял къахьунгу бюхъайшиврул ялув.
Ва ялагу, светофорданул ятIул­сса чани лавхъун пIякь бивкIун чIалай бунува ххуллул тия шийн инсан лахълахъаву жулла итталусса гьарца кьинисса суратну духьурчагу, цайми регионная бувкIминнал ва ва цаймигу кIанттурду жулла вахIшишиврул лишандалун ккалли буван бюхъайшиврул ялувгу.