Нузкьунттайсса
ва хьулурдайсса чичрурду
* * *
Ххуллулссай, нузкьунттайн кьутI маучара,
ЧантI учин мабара къатлул заллухъру:
Оьсса кьаст духьурчан, хьулуха насу,
Хъинсса кьаст духьурчан, къатлувун ухху.
* * *
Я ччяни, я чIалну – кIюрххих, хьхьуниву
Нузайн кьутI къачайссар дустурал тачIав:
Мудан тIиртIуннассар, дустал, ттул дакI зун,
Мудан тIивтIунмассар зун дарвазагу.
* * *
Ччарча хьхьудяризал, ччарча дя-дяхтта
Зу кьутI улучара жул дарвазалийн,
Хъамаличу увкIун, нузайн кьутI чирчан,
Балай кунма баяй му чIу ттул вичIан.
КIалазурдардийсса чичрурду
* * *
Ва аькьил къаивкIссар,
Къучагъ къаивкIссар,
Ванайн икрам бува –
Ва инсан ивкIссар.
* * *
Уттавама, ина винма ччимур ба,
Уттавама, ина ччан бивкIмур уча,
Хъамамабитара, нажагь бунугу,
Ттул гьаттацI бивщусса чарихгу урган.
* * *
Къучагъ ивкIссар талай бавккумунищал,
Бавккумур ттигу бур, къучагъма чув ур?
* * *
Эръэ матIра ина утти, оьручуй!
Гьаттаву шанай ур заллу – виричу.
Ганал тти вийн хьхьури къалаххантIиссар,
Я дяъвилул цIарайн ссур къабантIиссар.
* * *
Гьай, кIакIаш! Виричу ивкIунни куну,
Ина ххаришиву цахъис мадара!
Виричунал цала ттупанг ва ххаржан
Шийрарча къадиртсса, гивун къаларсна.
* * *
Мискин – зунттал чувнал ва гьаттавусса
Ххазина, хъус, ризкьи салкьи къабувссар.
Амма щиллив тIисса балай ваналли,
Амма цурив тIисса балай ванахар.
* * *
Ялугьлай уссия инт дучIаннин ва,
Марххала гьаннин.
ДуркIунни, ларгунни интгу ччянира,
Ванан къакIулли.
* * *
Гьай, сагъма! Вил кьадар кIусса бивкIхьурча,
Дард мадара, уссу, ттулмур хъуннича.
* * *
Цукунсса барчагу жува ххуллурду,
Ахир цара ца дур – циняв шиккун бур.
Ххаржантрайсса чичрурду
* * *
Вана ттул кIяла кьуру –
Дуснал кIунттиву бугьан.
МицI ва дайлсса зумарду –
Душманнал хъазамравун.
* * *
Цилла къатлув кунна ххаржан къадакьай,
Ява, кIулну икIу, ххаржан ласуннин!
* * *
Ххаржан дугьан ччарча, дус, кIулну икIу,
Карунияргу хьхьичI бакI аьркиншиву.
* * *
Ванил, зюннав бакъанма,
КIива балай учайссар:
Ца балай – бивкIулуха,
Цагу – тархъаншивруха.
* * *
Мудан ттун цIими шай
Нава увтманай,
Ккавккун ччан къаикIай
УтантIимагу.
* * *
Вил канихьсса ххаржан къюкIссар, мурчIиссар.
ТIайла къадацIарчан, аьтIутIу, уссу!
* * *
Ттуй кIира зума дур
Душман утайсса:
Ца дайл дувай ччаврил,
Цагурив – зидлил.
* * *
Дунъяллул гъунттулу
Ччянива кIулссар:
Сси багьнугу, ххаржан
Къучагънахь дайлссар.
* * *
Хъа байни, ттул кьуру кIунттил булугьи,
Хъамур зумардайсса дайлшиврийн бува.
* * *
Буттал кьисас ласун тIий,
Ятин ххаржан дуллай ур,
Ятиннал ххаржандалул
Цимигу анссар ятин.
ХIан хIачIай кьурттайсса чичрурду
* * *
Бюхттулнура дикIувча
Щин хIурматрай, сийлийна.
Нарив ницал бакIрая
Щин рутIлан къалавсъссара.
* * *
ХIан хIарчIума лавгун ур,
ХIачIлачIимагу гьанссар,
ХIарагу-къахIачIайма
Мурив шийва личIанма?
* * *
Нани, хIачIаннуча, хIачIан шайссаксса,
ХIачIан багьанамур лякъинтIиссарча.
* * *
ХIан рутIай кьурттаран бавцири затру
Циняв къабаяйссар хIатта Заннангу.
* * *
Винна ччикун хIачIи – чанну, чIяруну,
Хъамамабитара шаппайсса ххуллу.
* * *
Ца-ца аькьилгума хIанттил ахIмакь ай…
Ца-ца ахIмакьгума хIанттил аькьил ай.
* * *
ХIан хIачIан гьарцаннан, гьай-гьай, бучIиссар,
Так – циксса, ци чIумал, ссахлу ва щищал
Таврдайсса ва кIарттайсса чичрурду
* * *
Ци кIанттайн оьрмулул ина увтнугу,
Вищал дикIантIиссар ттул гъилишиву.
* * *
Лещарчангу ттул цIу,
Ттуй хIайп мачари,
ХIайп улучара зу
Ттул цIу чан хьунай.
* * *
Буттал къатлувусса ужагърах куна,
ЧувчIаввагу гъили къалагантIиссар.
* * *
Буттал шяравунай зана ивкIукун,
ВярчIухсса пуркIугу ссайгъат ххантIиссар.
ДакIнийн бичинтIиссар бухсса балайрду
Ина ва цIарах.
* * *
ВичIан бучIантIиссар цIусса балайрду
Вара цIарахун.
Аьнди варсайсса чичрурду
* * *
Симинияр кIукIлусса варсул чурчив бунугу,
Чаннаннил дакIру дусса вирттаврал къатта хьуссар.
* * *
Къучагънал ва аькьилнал хъачIунттай бавкьуссара,
Бурганнуча, бакьайрив утти вилми хъачIунттай.
* * *
Зун къатта къагьарив хъун лухIи варси?
Ччаву хьусса кIиннан варсигу къаттар.
* * *
Варсулу ссур банссар виричунал чу,
Ччарча ссапарданий, ччарча дяъвилий.
Варсуй зана хьунссар шавай виричу,
Я ялтту ливчуну, я кай-кай увну.
* * *
Замгьар буккарчагу, зюви хьурчагу,
Вин магъи ва шанур лухIисса варси.
* * *
Варси лухIинугу, лухIи дакI дума
Гъили къаантIиссар, дакI марцIма акъа.
ОьрчIал кIанттайсса чичрурду
* * *
Арамтал, кьабагьи –
ОьрчI шанан ччай ур.
Я битлан, я бутлан
Аьркиншив дакъар.
* * *
ЧIири кIяла хьусса хъунавхьу ттаттай,
Инагу ссур бувссар вана вава чай.
* * *
МакI ххуйсса ккакканнав шиву шанайнан,
ТIайлагу дацIаннав макI кIихьра ванан.
КIиллайсса чичрурду
* * *
ЩяикIу кIиллуву хъунав хьунцIакул,
Ягу чал ччанналун агьаннинцIакул.
* * *
Къучагътурал кIантту я чал кIиллувур,
Ягу аьрщараву, хъартсса гьаттавур.
* * *
Къучагъ, мадишара
На чил чал бурхIай.
* * *
КIиллуву хъуна хьу, хъунассагу хьу,
КIили вил кIаралур, кIили вил шанур.
Чагъанттайсса
ва чугурдайсса чичрурду
* * *
Ина – чагъанара, ххаржан бакъара.
Ххаржандалияргу ина гужссара:
Ххаржандалул литIай сагъсса инсантал,
Инарив ливтIуми уттава бара.
* * *
Къапкъазнал зунттаву балай чай чугур
Балайлулли цуппа ляхъангу бувсса.
* * *
ДакIнийн бутан ччарча бакъа хьусса дус,
Хъазамрайн лахъан ба ина чагъана,
Зана бантIиссар вин бакъа хьусса дус,
ЛахIзалий бунугу, чагъанттулгуча.
* * *
Чил улклуйн ачирчан, чагъана ласи,
ИчIува ина му кьамабитара.
Гъурбатрай вин мунил гъан бавантIиссар
Буттахъал улчагу, вилла тIювагу.
Таржума Юсуп Хаппалаевлул
