ОьрчIан халкьуннал пишарду кIулну бикIаншиврул

МахIачкъалалив, Дагъусттан Республикалул Художниктурал союзрал къатрал Выставкартту дувай залдануву, хьунни халкьуннал канил пишардал мастер-классру.

Вай хьунни декоратив-прикладной искусствалул «Дагъусттаннал щаращив» тIисса цIанилусса Республикалул выставкалул лагрулий ва халкьуннал шаэр Р. ХIамзатов ниттил увну 100 шин шаврин хасну. Вайннул сиптачитал ва сакиншинначитал бия ДР-лул Культуралул министерство ва Халкьуннал творчествалул къатта.

Ва кьини мастер-классру буллай бия халкьуннал пишардал усттартал, вайннавух бия лакрал миллатраяссагу: бархъаллал тIахIунтту даврилмур мастер-класс бачин бувну бия Земфира Мусаева, ссихьри даврил­сса – Зугьра Гьарунова. Ва кьини, вай бакъасса, мукунма хьуна цайми пишардалми мастер-классругу.

Вайннувух гьуртту хьуна 200-ннийн бив­сса жагьилтал: Политехнический колледжрал, Дизайндалул, экономикалул ва правалул техникумрал студентътал, генерал-полковник Г.Н. Трошевлул цIанийсса Дагъусттаннал кадетътурал корпусрал дуклаки оьрчIру, кулпатран ва оьрчIан социал кумаг баврил Республикалул центрданул аякьа дуллалисса оьрчIру.
Шиккува искусствовед Татьяна Петенинал оьрчIан бувна «Жула Расул» тIисса выставкалийхсса экскурсиягу.