[dropcap]Ф[/dropcap]евраль зурул 7-нний Дагъусттаннал ХIукуматрал Председатель Аьбдулмуслим Аьбдулмуслимовлул каялувшиннаралу хьунни МахIачкъалаллал аэропортрай реконструкциялул кIилчинмур бутIувусса давуртту даврин хас дурсса инвестициялул проект иширайну зузи даврил хIакъиравусса масъалартту ххал бигьлагьисса совещание.

ДакIнийн бутанну, ДР-лул ХIукуматрал АхIмад-Хан Султаннул цIанийсса МахIачкъалаллал аэропортращал ялув кIицI лавгсса цIусса проект иширайну зузи дансса кьутIи дурну душиву.
Совещаниялул даву дайдихьлай, премьер-министрнал кIицI лавгунни республикалул бюджетрава 515 млн арцул итабакьлай бушиву аэропортрал лагма-ялттусса инфраструктура къулай даву мурадрайсса давуртту даврин. Мукунма бувсунни ларгсса шинал ноябрь зурул ахирданий жаваблувсса органнайн тапшур бувну бивкIшиву реконструкция даврил проектрал хIакъиравусса хIукму биттур баврил масъалартту.

Цалчин ва масъалалул хIакъи­раву дурсса даврия бувсунни ДР-лул аьрщарал ва имуществалул иширттал министр Заур Эминовлул.
Ванал бусаврийн бувну, реконструкциялул проектрал лагрулий хьхьичIра-хьхьичI дуллай байбишин аьркинну бур гьаваллавухсса кабеллал ттукIрал линияртту, автомобиллал стоянкар­тту ва миннучIансса ххуллу, насосный станциялул канализацияртту ва щин марцI дайсса сооруженияртту дуллай. КIицI лавгунни ккаккан дурну душиву электричествалул устройствардал объектру дансса аьрщи.

Му бакъассагу, Заур Эминовлул бувсунни 2000 куб. метралул дусса насосный станциялул канализациялул резервуарданул строительствалун, щин марцI даврил сооружениярттан ва украсса машинарттал стонякалучIансса ххуллу бавринсса давурттанссагу аьрщи ккаккан дурну душиву.
«Реконструкциялул кIил­чинмур бутIул проектрал план даврил документация ххал дигьаву тIалав буллалисса информация биян бувссар МахIачкъалаллал аэропортрал каялувчитурачIан. ДР-лул Строительствалул министерствалулгу кумаг бантIиссар реконструкция дансса аьрщарал пландалул документация ххал дигьинсса.
Техникалул бутIувусса ва проект дансса заданияртту цIакь дантIиссар реконструкциялул давуртту дансса документация хIадур дурну махъ. Шивун духлахиссар реконструкциялул строительствалул объектру бансса цинярда аьрщарал ва «Россети» ПАО-лул сетирдавух хIала буххансса техникалул шартIру дузал даврил проектрал документацияртту», – увкунни Эминовлул.

ДР-лул архитектуралул, строительствалул министр Артур Сулаймановлул бувсунни цIанасса ппурттуву ялув кIицI ларгсса инфраструктуралул объектру даврил масъалартту ххал бигьлай бушиву.

«2000 куб. метра дусса ка­нализациялул насосный стан­ция(КНС) баврил проект дуллалийни, хIукму бувну буссия мунин кIанай модульданул лагрулий бансса. Электроснабжениялул линияртту даврил хIакъиравусса масъалартту ххал бивгьуссар «Россети Северный Кавказ» ПАО-лущал. Ва масъалалул хIакъираву ялугьлай буру «Россети Северный Кавказ» ПАО-лул чулуха гихунмай энергия ишла баврихсса багьа ккаккан баннин.

Регламентрал ккаккан дурсса чIун дур ва аьрза шанма гьантлул мутталий ххал бигьинсса. ДР-лул Строительствалул ва энергетикалул министерствалул цачIуну ххал бигьлай буссар техусловияртту анаварсса мутталий дузал дансса ххишаласса чаранну», – увкунни Артур Сулаймановлул.
Совещаниялий махъ буллунни МахIачкъалаллал аэропортрал хъунама директор Саэд Рамазановлухьхьун. Цала ихтилатраву ванал кIицI лавгунни, махъсса шанма зурул лагрулий аэропортрал реконструкция даврил даву чялишну най душиву.

«Аьбдулмуслим МухIу­тти­нович, шиннардий къадур­сса даву вил каялувшиннаралу вай махъсса шанма зурул мутталий дуршиву мяйжан хьунни. ХIакьину аэропортрай, дансса объектругу ккаккан дурну, дачин дурну дуссар миннул хIакъиравусса давуртту. Инвестициялул проект иширайну зузи дансса цалчинсса шаттирду лавсъссар», – увкунни Саэд Рамазановлул.
Ихтилатирттах вичIи дирхьуну махъ, Аьбдулмуслим Аьбдулмуслимовлул цаппара амрурду бунни вай давурттал жаваблувшиву дуллалисса органнайн. Хаснува анавар буккан бан тIалав бунни «Россети Северный Кавказ» ПАО-лул сетирдал техникалул шартIру щаллу даврил ва гьаваллавухсса кабеллал электролиниярттансса ххуллу ккаккан баврил масъалартту.