[dropcap]Ф[/dropcap]евраль зурул 8-нний «Дагестанская правда» кказитрал редакциялий республикалул миллатрал политикалул ва диннал иширттал министр Энрик Муслимов журналистътуращал хьунаавкьунни. Ванал бувсунни ларгсса шинал цала министерствалул дурсса агьамсса давурттая. Бувсунни так ларгсса шинал личIи-личIисса мазурдийсса ацIва лу итабавкьушиву, ниттил мазурдих къулагъас чан къадувайшиву, мукунма ниттил мазурдийсса диктантру чичаврил сиптачиталну ва сакиншинначиталну бивкIшиву.
Школарттай ниттил мазру лахьхьин буваврил хIакъираву ванал чIурчIав дунни цIанакул бувагу ниттил мазру къакIулсса оьрчIру цалчинми классирттавун букIлай бушиврий, учительтурал лахьхьин буваннин къаялугьлай, ичIува нитти-буттахъал лахьхьин буллан аьркиншиврий.
– Жулла никирал агьлу цалчинми классирттавун лагайссияв оьрус мазрай сайки ца калима дуван къакIулну, лахьхьайвахха жунма цинявннан оьрус маз, утти ца калима ниттил мазрай къакIулсса дуклаки оьрчIру бур, тахсир учительтурайн, школарттайн бутлан бигьар, амма мунийну тагьар даххана къахьунссар. Школарттай къаагьамсса бунутIий бакъар ниттил мазру къалахьлахьиссача, нитти-буттахъал лахьхьин къабуллайтIийри, ниттил маз ябаврил ххуллу ичIуватур нанисса, – увкунни ванал.
Дурсса давурттавух кIицI лавгунни Аьрасатнал 36 субъектрай халкьуннал шаэр Фазу Аьлиевал 90 шинал юбилейран хас дурсса 120 мероприятие хьушиву ва гьашину Расул ХIамзатовлул юбилейран хасну 33 региондалий 130 мероприятие дувансса ният душиву. Украиннавусса спецоперациялул чIарав бацIан, аьрайн бувцуминнан лаххия ласунсса арцу цалчинминнавух цалва министерствалул зузалтрал дартIшивугу бувсунни.
– Жу хIасул бувссия кумаграл иширттаха зунсса группа, 250 тонна гуманитар кумаграл дартIун диян дурссар, аьркинмур ласунсса арцугу дартIссар , – увкунни ванал. Жагьилтуравун, оьрчIавун патриот зумунусса асарду бутлатисса давурттавух кIицI ларгунни «Ттуршва лекция» тIисса проект бартдиргьушиву. Ва проектрал лагрулий колледжирттаву, вузирттаву Ватандалухсса ччаву хьхьичIунну дикIан аьркиншивриятусса лекцияртту бувккушиву.
