КIинтнил даэрдай геоботаникалул хъиривлаявуртту дуллантIий бур

Гьашину махъсса 30 шинай цалчин Дагъусттаннай дантIий бур кIинтнил даэрдал 11 азарда гектарданийсса геоботаникалун хасъсса хъиривлаявуртту. Муния бувсунни ДР-лул Шяраваллил хозяйствалул ва бакIлахъиялул министерствалул. Хъиривлаявуртту дуллантIий бур «Государственный центр агрохимической службы «Дагестанский» тIисса ФГБУ-лул.

Аграр идаралул министрнал цалчинма хъиривчу Шарип Шариповлул тIимунийну, му хъинну агьамсса давуну хъанай дур, мунил хъунмур мураднугу бур лухччайсса лазундарал тагьар кIул даву.
– Республикалул каялувчи­нал сукку бувну бур дикI ва накI ххишалану ласлансса, лазундарая мюнпат ххишала хьун буллансса масъала. МуницIун бавхIуну, цинияргу хьхьичI аьркинну бур лухччал тагьар кIул дуван, лухччив хъанай дуну тIий региондалул ризкьи ябаврил хъунмур базану, республикалул кIинтнил даэрдай дур сайки 1,3 млн гектарданул.
Жула республикалий геоботаникалул хъиривлаявуртту къадурну дур сайки 30 шинал мутталий. Му даву нормативрал тIалавшиндарайн бувну дуван аьркинссар 15 шинай цал. Мунийну хIакьну кIул дуван бюхъантIий бур кIинтнил даэрдал лухччал лазундарал тагьар. Мунийну бюхълай бур ялагу аьрщив тIайлану ишла дуллан, кIул буван лухччай циксса ризкьи ябан багьлагьиссарив, лух­ччив къундалул авлахърайн кIура къадаяншиврул, – кунни Шарип Шариповлул.
Ванал тIимунийну, ризкьичитурал мурад бур лазуни хIадур дувайсса лухччай уртту чIярусса ххяххаву. ДР-лул шяраваллил хозяйствалул министерствалул шайсса кумаг буллантIий бур ми давуртту лядуккаврил цIаний.