Окопирттансса хъамул чирахъру

«Аьрасат – ттул тарихри» тIисса МахIачкъалаллал тарихийсса паркраву хьунни «ДакIнил гъилишиву» тIисса акциялул лагрулий окопирттаву ишла буллансса хъамул чирахъру буван лахьхьин буллалисса мастер-класс.

Ва даврил сиптачиталну бур ЦIуликъяннал шяравасса, МахIачкъалалив яхъанахъисса ХIажи ва Марзият Илиясовхъул, «Ниттихъал гуж» тIисса ккуран, Буттал кIанттул Талаталтрал кулпатирттал комитет, Дагъус­ттаннал хъаннил союз, «Единая Россия» партиялул хъаннилмур ккуран ва кIицI лавгсса парк цуппагу. БавтIцириннахьхьун ссалам буллалисса махъ лахълай, миллатирттал политикалул ва диндалул иширттал министр Энрик Муслимовлул барчаллагь увкунни акциялул сиптачитурахь, кIицI лавгунни «Гьарзат фронтран! Гьарзат Ххувшаврин!» тIисса лозунг хIакьинусса кьини цIунил агьамсса душиву ва ххувшаву гъан дуллай хIарачат буллалисса республикалий чIявусса бушиву. СВО-лул гьурттучитурал Ибрагьимхалил ХIажиевлул и Атай Сайпулаевлулгу кIицI лавгунни талаталтран дакI дуллалисса чумартшиву асар хъанахъишиву. Тарихийсса паркрал хъунама Тимур Велихановлул цайми идарартталгу цачIара дуллалисса даву тикрал дуванссар тIисса вихшала душиврий чIурчIав дунни.
Дагъусттаннал Информациялул ва печатьрал агентствалул хъунаманал цалчинма хъиривчу Наида МахIаммадовал кIицI лавгунни билаятрал тарихраву цимилагу исват хьушиву къин­ттуллухмигу цахьуну зузавриву бушиву жулва гужгу, кьуватгу.
Ихтилатру бунни Республикалул ХIукуматрал ва БакIчинал администрациялул проектирттал отделданул хъунама Шамил Аьлиевлул, Дагъусттаннал Хъаннил союзрал хъунмур Интизар Мамутаевал, «Бизнесрал хъами» ДРО ООО-лул хъунмур Ссапижат МахIаммадрасуловал.
Мероприятиялул ахирданий балайчитурал Зульфия Илиясовал ва Мурад Хушлаевлул увкуна патриот темалул балайрду.
Январь зурул 20-нний бувксса «Илчилул» 2-мур номерданий жу бувсъссия окопирттаву ишла бансса хъамул чирахъру буллалисса Илиясовхъал кулпатрая, вайннал шаппа бувсса 500-нниха ливчусса хъамул чирахъру аьрайн тIайла бувкшивугу. Утти, вайннал даврия эбрат ларсун, ва даву гихуннай дачин дуванмигу буклай вана, Марзиятлул ва ХIажинал хъиндайдихьу барачат хьуну.