Турциянаву ва Сириянаву аьрщи сукку хьуну ливтIуминнал ва бивщуминнал сияхI ссятрая ссятрайн хъунна хъанай дур.
АрвахIкьини кIюрххил ивкIусса 6234 инсан хьушиву, щавурду дирсса 37 000-нниха ливчусса бушиву баян бувна Турциянал Президент Ражаб Тайип Эрдоганнул. ЯтIул Ххачлил баян бувна Сириянавугу тталаткьини ахттакьунмай 1500-нниха ливчусса инсантал ливтIусса бушиву. Турциянал хъунаманал бувсунни, эяллайн дурксса къатри зехлай, инсантал ххассал буллай, зий бушиву 50 000-нниха ливчусса инсантал. Аьрасатнал Минобороналул баян бунни Сириянавусса Аьрасатнал аьралитурал ца кьини 42 инсан лекьрурдава ххассал увшиву. Февраль зурул 7-нний Аьрасатнал 113 ххассалбуву Турциянаву зий айивхьушиву, хъирив кьинигу ххассалбувултрал группа тIайла буклакишиву баян бувна Аьрасатнал МЧС-рал хъунаманал.
Аьрасатнал Президент Владимир Путиннул, Дагъусттаннал хъунама Сергей Меликовлулгу гассят баян бувна цивппа Турциянал ва Сириянал билаятирттал агьулданухь кьурчIишиву кIидачIлай бушиву ва шайсса кумаг буван хIадурну бушиву.
ДакIнийн бутанну Турциянаву, Кахраманмараш провинциялий, цIан-чаннаву аьрщи сукку хьушиву, му цурдагу 1939 шиная шийннай яла гужмур хьушиву. Зарзала хIисав хьуну дур Ливаннай, Иракьнаву, Израиллай, Гуржисттаннай, Абхазиянаву ва Аьрасатнаву Сочилий.
Сириянаву Алеппо, Латакия, Хама, Тартус провинциярттайгу хъунисса зараллу хьуну бур агьалинан ва къатран. ТIабиаьтрал цила гуж-кьуват ккаккан бунни цал уттигу. Инсантураннив цал уттигу исват хьунни цивппа тачIав тIабиаьтрал кашилущал къалаяйшиву, мунил бияла хъуншиву. Аллагьнал хъинмур чивчуну лякъиннав! Турциянал ва Сириянал билаятирттай ливтIуцириннал аьпа баннав, цIунцIияртту хьуми ччяни ччаннай бацIаннав, лекьа-пIякьу хьусса шагьрурду цIу буккан буллансса ссавургу, кашигу агьалинахьхьун дулуннав!
