МахIаммадов Чарак
Оьрмулул 82 шинаву аьпалухьхьун лавгунни Уручуллал шяравасса, ххишала акъа гьунарданул лавайсса инженер, хъинну бусравсса ва цIанихсса тухумрал вакил, уздансса багьу-бизулул чув МахIаммадов Чарак.
Уручуллал жяматрал лайкьсса арс аьпалухьхьун лагаврил пашманшивугу кIидачIлай, дакIнийхтунусса жижара буллай буру ванал уссурваврахь ХIажинахь, Зайнуттиннухь, Аьлиллухь, ссихь Зулайхатлухь, арснахь МахIаммадлухь, душваврахь Сураяхь, Каринахь ва махъсса щалагу агьлу-авладрахь, гъан-маччаминнахь.
Чараклул бунагьирттал аьпа баннав, рухI паракьатний дишиннав, имандалий лавгун хьуннав.
Уручуллал жямат
МахIаммадханнул душ Аьтикат Гарайханова
Уттигъанну аьпалухьхьун лавгунни ххаллилсса хIакин, Ккурккуллал жяматрачIа хъинну хIурматрайсса ва бусравсса хъамитайпа Гарайханова (Магьдиева) Аьтикат МахIаммадханнул душ.
Бувну бур Аьтикат 1950-ку шинал август зурул 12-нний Ккурккуллал шяраву. Медальданий Ккурккуллал школагу къуртал бувну, бувххун бур Дагъусттаннал медициналул институтравун.
Институтгу ванил ххуйсса кьиматирттай къуртал бувну бур. Зий бивкIун бур Дагъусттаннал геологтурал экспедициялий.
Мунияр махъ бувкIун бур Н.М. Кураевлул цIанийсса республикалул оьрчIал азарханалийн. ЧIяруми захIматрал шиннугу шикку, реанимациялул отделениялий, зий ларгун дур. АрхIала ва зий бикIайва «Урожай» спорткомплексравугу.
Дагъусттаннал ЦIуллу-сагъшиву дуруччаврил министерствалий зун бувцусса чIумалгу (шикку зийгу ванил цаппара шинну дурссар) Аьтикатлул цила отделение, цила оьрчIру кьакъабивтуна.
МукьцIаллихъайсса шинну дурну дур ванил медициналул ххуллий зий, миннувагу чIяруми мюрщи оьрчIал оьрмурду ххассал буллай.
– Гьарица дежурствалий ттул бакIрай ца-ца кIяла чIара ххи шай, – учайва оьрчIал реанимациялул отделениялий ци-цигу иширттащал хьунабакьлакьисса Аьтикатлул.
Аьтикат бия ДР-лул лайкь хьусса хIакин. ОьрчIал цIуллу-сагъшиву дуруччаврил цIаний бивхьусса захIматрахлу ва мукунма лайкь хьуну бия цикссагу ХIурматрал грамотарттан ва Барчаллагьрал чагъардан.
Яла хъуннамур наградалун ванил ккалли байва цищава ххассал бан бювхъусса оьрчIал нитти-буттал барчаллагьру.
Аьтикат бия лавайсса даражалул пишакар, цIими бусса, инсаннал чIарав бацIан, кумаг бан хIадурсса хIакин, бакIрал ххуйсса хъамитайпа. Ванил тIааьнсса чIунил ва бюххансса, цIимилийсса ихтилатралла куклу дайва цIуцIинал къюву.
Щил оьвчирчагу, хьхьу-кьини къаувкуну, га цIана отделениялийн бувкIун, цинявппа ччаннай бацIан бувну, аьркинну бухьурча, мугьлат бакъа операция бан бувну, оьрмулул ва бивкIулул ххуттайсса инсан ххассал айва.
Цикссагу мюрщи оьрчIру буккан бувссар ванил бивкIулул ххяппурттава.
Цикссагу нину-ппу буссар оьрмулухун ванийн барчаллагьрайсса.
Аьтикат щала агьулданул чул бищай кIанугу бия. Ккурккуллангу ва бакъа чара бакъассия. АрхIал зузиминначIагу ляличIисса хIурмат бикIайва.
Аьтикат аьпалул шаврил кьурчIишиву кIидачIлай, жижара буллай буру арснахь, ласнахь, уссурссуннахь, махъсса цинявппа гъан-маччанахь. Алжаннул ххари баннав, гьав нурданул дуцIиннав. Махъминнал оьрмурдай барачат бишиннав.
Ккурккуллал жямат
