Ванал магьирсса кIулшивуртту тIалавну дур гьарца кьини

Апаннинал арс ХIажи увну ур 1938-ку шинал февраль зурул 14-нний Хьурттал шяраву. Цала чIумух бурувгун, хъинну чантI увкусса инсан ивкIун ур ппу Апаннигу, динийссагу, дуниявийссагу кIулшивуртту дусса.


Ца-ца чIумал зун­ттал шяраваллавун къашайшалачIан, я машиналий, я самолетрай гьан къахъанай, дучрай гьан багьссагума ишру шайсса бивкIун бур.


Лакраву ва хьуну ур ПаччахI­лугърал университетрал кIулши­вур­тту ларсъсса цалчинсса учитель. Амма 30-ку шиннардийсса репрессиярттал щатIи ванайнгу щуну бур цIун хьунну. 1937-ку шинал ахирданий дуснакь увну, тивува аьпалухьхьун лавгун ур.
ХIажинан буттал лажин ккар­­­ккун дакъар. Гъумук 5 класс къур­­тал байхту, хъунама уссил Хайруттиннул ва цачIана шагьрулийн увцуну ур. Оьрус маз ххуйну къакIулсса оьрчIан цIу бутIуй захIмат хъанай бивкIун бур шагьрулул школалий дуклан. Амма ца шинава ванал цIа школалул хьхьичIунсса учениктуравух хьуну дур. ХIажинан яла ххирамур тарихрал дарс диркIун дур. Цувагу, школа къуртал байх­ту, Москавуллал университетрал тарихрал факультетрайн уххан ччай ивкIун ур. Амма иш цамур куццуй багьну бур. Школа ххуйсса кьиматирттай къуртал бувсса унугу, буттайсса «ттангъа» сававну, кьамул къаувну ур. Уссин Хайруттиннуннив ва, цува куна, медициналул ххуллийх лавгун ччай бивкIун бур. Ванах вичIи дирхьуну, ХIажигу Дагъусттаннал медициналул инс­титутравун увххун ур.

Буттал шяравалу чIалачIиний

Дуккин бюхъугу, гъирагу бусса жагьил институтравугу хьхьичIунну ивкIун ур. Ва гьуртту шайсса ивкIун ур институтрал жяматийсса давурттавух. Шанна шинай институтрал студентътурал элмийсса обществалул каялувчинугу ивкIун ур. Институт къуртал байхту, 1963-ку шинал, зун ивкIун ур шагьрулул 1-мур поликлиникалул участокрал хIакинну, шагьрулул 1-мур азарханалул ординаторну ва оьтту бутIайсса станциялул хIакин-лаборантну. Ца шинава Москавлив лавгун, увххун ур И.М. Сеченовлул цIанийсса 1-мур медициналул университетрал аспирантуралувун.
Цанма хъунмасса бахтти хьушиврун ккалли буллай ур ХIажи дунияллийх цIа дурксса терапевт А.Л. МясниковлучIан агьаву.
1966-ку шинал аспирантурагу къуртал бувну, лайкьну дурурччуну дур ванал медициналул элмурдал кандидатнал цIа. 1974-1989-ку шиннардий ХIажи зун ивкIун ур Дагъусттаннал медициналул университетрал 1-мур госпитальная терапиялул кафедралул доцентну. 1974-1978 шиннардий СССР-нул ЦIуллу-сагъшиву дуруччаврил министерствалул ва тIайла увккун ур Алжирдайн. Тийх Оран тIисса шагьрулул поликлиникалийгу зий, тиккувасса университетраву дарсругу дихьлай ивкIун ур. 1990-ку шиная айивхьуну, зий ивкIун ур Дагъусттаннал медициналул университетрал виваллил азардал кафедралий:1990-2013-ку шиннардий – доцентну, 2014-ку шиная айивхьуну – кафедралул профессорну. 2002-ку шинал лайкьну дурур­ччуну дур медициналул элмурдал докторнал диссертация.
Чув зий ухьурчагу, ва мудан къашайшалт хъин баврил даврил жаваблувману ивкIун ур. Ванал гьурттушиндарайну клиникарттай диагноз дишаврил ва хъин баврил цIу-цIусса кьяйдарду ишла дуллан бивкIун бур. ХIажи Апанниевич чIярусса шиннардий каялувшиву дуллай ивкIун ур агьалинан кумаг бан Дагъусттаннал шагьрурдайн ва районнайн заназисса медициналул академиялул бригадалий. Дагъусттаннай бакъахьунссар цавагу шагьру, царагу район инжитсса къашайшалачIан ХIажи Апанниевичлуйн къаоьвкусса.
Ца-ца чIумал зунттал шяраваллавун къашайшалачIан, я машиналий, я самолетрай гьан къахъанай, дучрай гьан багьссагума ишру шайсса бивкIун бур.
Укун, цикссагу инсантурал оьрмурду ххассал бувсса хIакин ур ХIажи. Институтрал цIуллу-сагъшиву дуруччаврил ххуллий ванал дурсса лайкьшивуртту чIярусса дур. Ванал кIунттила бувккун бур 136 элмийсса лу, ва учебно-методический пособие, миннува 11 – француз мазрай, дазул кьатIув зузисса чIумал.
ХIажи ур Дагъусттаннал лайкь хьусса хIакин. ЗахIматрал хху­ллий ванал хIалал дурну дур личIи-личIисса наградартту.
Махъсса цимирагу шинай зий ур Муххал ххуллул азарханалий.
ХIажи Апанниевичлул бур шанма оьрчI. Душ Зулайхат ва арс Оьмар, буттал пиша язи бувгьуну, медициналул ххуллийх лавгун бур. Зулайхат бур медициналул элмурдал кандидат, зий бур Дагъусттаннал Медуниверситетраву госпитал терапиялул кафедралий. ­Оьмар зий ур Республикалул клиникалул азарханалий къюк1лил ва туннурдал хирургиялул отделениялий. Апанни тIима арс экономист ур.
ЦIанагу ХIажи Апанниевич Муххал ххуллул азарханалий зий ур. Ванал хIурмат-кьимат ххишала бакъа хъунмасса бур архIал зузиминнал ва студентътурал дянив. Ванал куртIсса кIулшивуртту ва магьирсса опыт тIалавну бур мудангу, гьарца кьинигу.