Чувшиврий лархъсса кьини

Ккурккуллал школалий лавайсса даражалий кIицI ларгунни Ленинград блокадалува буккан бувсса кьини.

Шяраваллил майдан кьинилуха лавхьхьуну чIюлу бувну бия. ЧIирттайн лархъун дия блокадалия бусласисса плакатру ва суратру. Ца чулух бия Ленинградуллал халкьуннан итабакьлай бивкIсса 200 гр. дусса лухIи ччатIул касакру бивхьусса стол. Мюрщимигу, хъунимигу, ми ласун талоннугу дургьуну, лахъисса ирглий бавцIуну бия. Вайннах уруглагинал дакI аьсив дуклай дия. Учительтуралгу, дуклаки оьрчIалгу хъинну лавхьхьуну ккаккан дунни немецнал вив лавсъсса Ленинградуллал хъами-оьрчIал сипатру.
Ленинградуллал блокадалия бусласисса ихтилат бунни мероприятиялул сакиншинначи, школалул завуч Дианат ХIусмановал. Учительтурал ва оьрчIал дурккунни дяъвилул темалийсса назмурду.
ДакIнийн бутан, Ленинград бивкIссар блокадалуву 900 гьантлий, 1941 шинал сентябрь зурул 8-нния байбивхьуну, 1944 шинал январьданул 27-ннийн бияннин.
Буттал кIанттул цIанийсса Хъунмасса дяъвилул тарихраву Ленинград шагьрулул агьулданийх дурксса кьинирду яла оьхIалми хьуссар. Ккашилну, бявкъуну, лекьа-пIякьу хьусса къатраву, цукунчIавсса оьрмулул шартIру дакъасса кIанттурдай 900 кьини лархъссар Ленинградуллал халкьуннал.