Донбасс буручлачисса хасъсса аьралий операциялуву дагъусттан оьрчIал цIунилва-цIунил ккаккан дуллай бур цала сисаву ва къучагъшиву.
Чансса бакъар вайннавух жула лакку оьрчIругу. ЦIанасса чIумал гвардиялул хъунама лейтенант, гьужум бай взводрал командир Оьмар АьбдурахIманов гьуртту хъанай ур Донецкаллал областьрайсса Марьинка шагьрулул чIаравсса къизгъинсса талатавурттаву.
Оьмар ур ТIюхчардал шяравасса. Ва буслай ур гьарица къатлул, гьарица зивулул цIаний най душиву талатавуртту.
Марьино шагьрулул накIлил заводрайн гьужум бувсса чIумал ванайн щаву дирну диркIун дур. Хъин шайхту, цIунилгу цала кьюкьлувун зана хьуну ур. Оьмардул бусласимунийн бувну, вай талатисса кIанттурдай чIявусса наемниктал бусса бур. Ци чулийгу, ччясса чIумул мутталий ца ттигу агьамсса объект канийн ласунсса пикрилий бур.
Аьрасатнал Президент В. Путиннул хIукмулийну Оьмар АьбдурахIмановлун дуллуну дур «За отвагу» ва «За взятие Попасной» тIисса медаллу.
