Вай гьантрай чIявуссаннал итталун дагьунни жула ватанлув, ГьунчIукьатIрал шяраватусса ХIасан ХIасанхIажиевлул къучагъсса тIулуя бусласисса кутIасса видео. Ванал ххассал увну ур хасъсса аьралий операция нанисса кIанттай щавурду дирсса 10 аьраличу.

Ванал шяравучу Зиябуттин ХIажимирзаевлул бусаврийн бувну, «Мосгазрал» директор ХIасан ивкIун ур хасъсса аьралий операция нанисса кIанттай цала къуллугърал иширай командировкалий увкIун.
– МахIаттал хьунсса затнугу хъанай бур, ва иш ссуттилва хьуну бивкIун бунува, жунма дахьа утти аьлтту шаву. Ванал цалва гъан-маччаминнангума му кIулну бивкIун бакъар. ХIатта ттигума къабавнува личIанссия, агарда «Россия 24» телеканалданул алхIаткьини хъун дакъасса сюжет ккаккан къабувссания, – тIий ур Зиябуттин.
– Ашкара хьунни ХIасаннул ххассал увну ивкIшиву, Хаймерсрал снарядрал цIалцIив щуну, щавурду дирсса 10 Аьрасатнал аьраличу. ПIякьучаву хьуну дур ХIасан усса кIанттая арх дакъа. Анавархъиндарай цала куклу машиналий лавгун, цинявппа щавурду дирминнан цалчин­сса кумаггу бувну, ВСУ-лул ритлатисса цIалцIал цIаравух буккан бувну нигьачIаву дакъасса кIанттайн, гичча биян бувну бур госпитальданийн.
Зиябуттиннул бусаврийн бувну, ХIасанхIажиев ккаккан увну ур «За заслуги перед Отечеством» ордендалун.
Ванан баян бувну бур Баргълагавал аьралий округрал аьралуннай каялувшиву дуллалисса генерал-полковник Сергей Кузовлевлул цIаниясса Барчаллагьгу .
Гьизбуллагьлул арс ХIасан­хIажиев ХIасан увну ур февраль зурул 2-нний 1955 шинал. Къуртал бувну бур Москавуллал Энергетикалул институт. Зий айивхьуну ур Аьрасатнал Федерациялул коммунал хозяйствалул аралуву. 1988 шинал зун ивкIун ур СССР-данул Элмурдал академиялул Дагъусттанналмур филиалданий, промышленностьраву ишла дай­сса цIакьсса чугун ахттар давриха. 1999 шинал ХIасан цIакь увну ур Москавуллал Ччуччиялул ва энергетикалул хозяйствалул департаментрал отделданул хъунама пишакарну.
Тания мукьах, 2017 шинайн ияннин, ХIасаннул бивтун бур лахъисса захIматрал ххуллу, укунасса зузалая айивхьуну, «МОСГАЗ-рал» директорнал къуллугърайн лахъаннин. Ва къуллугърай зий дурну дур 8 шин. 2017 шинал ванал бувккуну бур Строительствалул ва промышленностьрал комплексрал регионнал дянивсса академиягу.
2017 шинал ивтун ур Москавуллал ЖКХ-лул Департаментрал каялувчину.
ХIасан ХIасанхIажиев лайкь хьуну ур «Москавуллал хIурмат лавайсса энергетик», «Москавуллал ЖКХ-лул хIурмат лавай­сса зузала» ва «Аьрасатнал Федерациялул бусравсса энергетик» тIисса цIардан.