Вана нагу Редукторныйлив­сса «Синема холл» кинотеатрдануву хьунна биялсса аваза бувтсса «Чебурашка» киносурат кка­ккан. Нюжмар ххишалагу хьуна арс хъин ивкIун, Пушкиннул карталий билетру лавсун, кинорахун бачу тIий. Ларгсса бигьалагай кьинирдай гьан ччай буссияв. Агь, вил къаттай, билетру бирияйххивав, хъиривми бигьалагай кьинирдайнмагу бакъая. Бия билетру арвахIкьини ссят ххюнний­сса сеансрайн. МаркIачIанми сеансирттайн бакъая. Жу кунма, тIааьнсса, ххуйсса асардах ххуцI бувкмигу цикссагу бакъарив. Чебурашка совет заманнул персонаж бушиврувугу бухьунссия иш, оьрчIшиву дакIнийн рутан бувкIру тIисса чIаххулгу хьунабавкьуна залдануву. Кинордал эксперт бакъара, амма найбунува учинна, лагаврия ххари бакъа, пашман къавхьунна.

ХIакьину Чебурашка щаллагу кьянкьа-кьурчIисса дунияллун аьркинну бур инсантурал дакIру хъюлчай учин дувансса персонаж хIисаврай. Хъинмунил, ххуймунил хIукъу хIисаврай. Дюхлулул марч дакIурдивун бувхсса асар бутлатисса кино дия бакIрая магърайн дияннин. Чебурашка дунияллийн ляхъуну бур дакIру оьсса инсантал тарбия буллан, хъиншиврул гьанна зизлан.ДакI чарилсса кунасса багъманчи Генахь Чебурашка бур «инсанну бикIан захIматрикьай, зу , инсантал, пашмансса агьлу буру, зун багъишла битан къакIулну тIий, я зува хIалал битан, я цайми…» Чебурашкал паргалну дассан дурунни лагмацириннал микIирал дакIру. Киносурат къуртал хьунни 1971 шиналсса машгьур­сса мультикравасса балайлийну. Залданувуцири, хъунимигу, мюрщимигу, хорданий бавхIуну «Пусть бегут неуклюже…» тIий булувкьуну бия.

Ваца балай итабакьин икьрал дурсса кунма. Тяхъасса симаннащал був­ккун най бия тамашачитал. Азарийла учирчагу, уттигу тикрал буван, жулва оьрчIан аьркинни гьамин укунсса мяъна-мурадирттал мультикру. Ццахханнарал ужастикирттая, ттявх-шявхлия, оьрчIал психикалийн щавщи биян буварча бакъа, мюнпат бакъар. Чебурашкалувурив бургъил тIимулул тIилисин бур. Киносуратрал рангру, вацIри, тIабиаьт , цимурца яргсса асардал видуцIин дуллалисса. Апельсиннал гъаралмур ябатIин къашайсса . Шиккува бусан, съёмкарттан ряхра тонна апельсиннал ишла дурну дур. Кинораву­сса ишру хьхьирицIсса шагьрулий хъанахъиссар тIий бакъасса, цIа къарищурчагу, жунма кIулли хьхьирил зуманицIсса шагьрурду Пятигорск, Кисловодск ва Сочи бушиву. Туристал ила бичинсса даву хьунссия укунсса даражалийсса яргсса киносурат Дагъусттаннай ласурча. Зунттал ва хьхьирил билаят, караматсса тIабиаьт, лайкьрихха Дагъус­ттангу Аьрасатнал прокатрал лидер хьунсса киносуратран.