Блокадалул Ленинградран хаснуv

Санкт-Петербург шагьрулийсса Дагъусттаннал художниктал, цивгу Дагъусттан Республикалул халкьуннал художник Арсен Къардашовлул каялувшиндаралусса «Открытая ладонь» цIанилусса творчествалул сакиншиндаравун бухлахисса, цIанасса чIумал гьуртту хъанай бур Ленинград блокадалува буккан баврин хас дурсса выставкалий.


Санкт-Петербургуллал Художниктурал союзрал Выставкартту дувай залдануву ккаккиялун дирхьуну дур 200-нния ливчусса художниктурал каруннил дурмур: живописьрал, скульптуралул, графикалул, сурат­рал, декоративно-прикладной искусствалул журалул произведенияртту.
Цала Арсен Къардашовлул ккаккиялун дирхьуну дур «Дусшиву» цIанилусса даву.

– Хъун дяъвилул шиннардий Совет Союзрал цинявппагу миллатру цану, ца хьуну талай бивкIун тIийри гужсса ва оьхIалсса душманнаяр ххув хьун бювхъусса. Жулва гуж – цашиврувур, ва кIану мудан дакIний бикIан аьркинссар, – тIий ур художник цува.

Санкт-Петербургуллал Художниктурал союзрал член Сакинат Исмяиловал выставкалий дирхьуну дур «Скорбь» тIисса композиция, Дагъусттан Республикалул лайкь хьусса художник, Технологиялул ва дизайнрал СПбГУ-рал сурат дишаврил ва живописьрал кафедралул профессор Муса Мусаевлул тIурча, «Мы погибли бы, если не погибали…» цIанилусса даву.
Санкт-Петербург шагьрулийсса Дагъусттаннал постпредствалул каялувчи ХIасан ХIасановлул барча бувна ва выставкалий гьуртту хъанахъисса Дагъусттаннал цинявппагу художниктал, чIа увкуна вайннан творчествалувусса цIу-цIусса хьхьичIуннайшивуртту.