Лакрал театрданул цIунилгу ккаккан бунни 2021-ку шинал ахирданий бивхьусса палангнал комедия, Франсис Вебердул «Контракт» тIисса произведениялийнусса спектакль «Нядуку» («Зануда»).

Пьеса лакку мазрайн бувцуну бур Руслан Башаевлул.
Бивхьуну бур спектакль Болгарнал режиссер Богдан Петканиннул, уттинингу Шекспирдул кIива бюхттулсса произведение «Ромео ва Джульетта» ва «Гамлет» хъунмасса тIайлабацIулущал Лакрал театрданул сахIналийн буккан бувсса. Байбихьулийва Вебердул сценарий чирчуну дур кинофильмран цIа куну. Амма Лакрал театрдануву бишиннингу ва спектакль М. Горькийл цIанийсса Ростовуллал академический театрданул ва Ухссавнил АьсатIиннал паччахIлугърал оьрус­нал академический театрданул сахIнардай бивхьусса Богдан Петканиннул ябитаврийну, текстрал пасихIшиврийну ва боевикрал жанр комедиялийн кIура баен барча, театрал постановка киноленталияр ялтту буклай бур.

«Ва киноленталул дур цаппарасса вариантру: кIира палангнал, цагу американал. Амма, ттул пикрилий, царагу сурат тIайлабацIусса хьуну чIалай дакъар. Мунияту дакI дарцIуну ура на ва текст кинораннияр театрал постановкалун бавкьусса бушиврий», – тIий ур Петканин.

Ххуй бивзунни дагъусттаннал тамашачитуран болгарнал тIин бусса палангнал къямадия, хъинну хIазсса, бувчIингу бигьасса.
Пьесалул сюжет, ччимур комедиялул кунма, лаласун бигьасса бур: цанницIун ца лавчIсса патирданул номердаву ликлай ур алши бакъасса фоторепортер Пиньон (Ислам МахIаммадов) ва Жан (Адам ХIайдаев), ца агьамсса мафиоз-бара ивчIансса мурадрай увкIсса киллер. Ххишалдаран алшибакъу цувагу ур нядуку, бизар шаврил цачIату кулпат ливхъун лавгсса (Жамила Закарьяева). Ганан тIурча, ччай бур, цанма цала банна тIий, нигьабусан бувну, кулпат зана бан. Му сававрай чIаххуврайсса киллернангу багьлай бур Пиньон цаятува цува яуллан.
ХIазну ккаккан увну ур спектакльдануву цува киллергу, цал бакIран Пиньон сававну чIя­вусса ккаклай байбивхьусса.

Лакрал театрданул сахIналий ттинин дургьусса роллаха къалархьхьусса дур Адам ХIай­даевлул роль. Цайнма бяйкьуну бувсса шанаши ай ххалаххул шанаши къауван хIарачат буллалийни, хаснува. Га цимилагу личIи-личIисса журалий шанийн агьай, амма гава цIана, цува ци мурадрай увкIссарив дакIнийн багьну, изай. Актернаву къямадиянал гьунар аьлтта чIалай бур. Сайки бачIи спектакльдануву га ур чурххал гьарца базу зурзутIи бувну, къуццу тIий сахIналий, хъяхъаврил залгу бур лавсун лагавай.
Бигьану бакъахьунссия бунияласса роллу дугьлай вардишсса Ислам МахIаммадовлунгу нядукул роль дугьан. ДакI хъинсса, аьчухсса инсан, цува цимурца тIайлану буллалишиврий дакI дарцIусса, амма цичIав дузрайн буклай бакъар. Мунияту ур га ахIмакьну чIалай.

БайкъалитIавай бусларчагу, шайссарив кказитрал чIапIуй актернал тIуркIу ккаккан бан. Оьннасса хьхьу дялахъан дан насияра зува Лакрал театрданувун, алши бакъасса нядукуй ва мурад дузрайн буккан къабувнува ливчIсса киллернай буччиннин хъяхъаву дан.