ЦIуссалакрал райондалиясса жагьилтал цалчинсса гьантрая шихунмай гьуртту хъанай бур Донбасс буруччаву мурадрайсса хасъсса аьралий операциялуву. Миннавасса ца ур ЦIуссачIурттащиял шяравасса Къушиев Абумуслим МахIаммадшяпинал арс.
Ва ивкIун ур армиялий 2015-2016-ку шиннардий. Къуллугъ буллай ивкIун ур Екатеринбурграй 28-мур мотострелковый бригадалуву. 2018-ку шинал къуллугъ буллан ивкIун ур Аьрасатнал Национал гвардиялуву Гудермес шагьрулий.
Хасъсса аьралий операция байбишайхту, къуллугърал бурж бартбигьлай ур Херсоннал ва Запорожуллал областирдай.
– Шикку жун саллатIталнугу, хIакинталнугу, психологталнугу бикIан багьлай бур. Талан бакъассагу, цалчинсса медициналул кумаг бангу, психологический давлениялул лахIан бан къабацIангу кIулну бикIан аьркинну бур, – тIий ур Абумуслим.
Ва хъисвагу пашманну акъар Донбасс шагьрулул агьали неонацистътурая буруччаву мурадрай хасъсса аьралий операциялуву гьуртту хъанахъаврий.
