Муркъилийнияр ахъуву хъинмуния
КIинттул ахъуву, дачалий дулланмур къадикIай. Ванийн бувну кIи дур интту ишла дувансса оьргъашиврун аьркинмур салкьи дуллан яла хъинмур чIун. Оьргъашиврун ишла дуван бюхълай бур, жура дуркуну, дукралун ишла дурну лирчIмургума. Анавар мабуккару ккунукрал, нувщул, чимусул, банандалул макьартту-ккиртту, заваркалул чяма экьидичин. Вай цимурца жущара инттухуннай ахъуву, дачалий мюнпатну аьркин дан хьунтIиссар. Шиву чIявуссар аьрщаран ва ваний дугьлагьимунин чара бакъа аьркинсса витаминну ва цаймигу затру.
Кофелул дукь
Шахьан дувайсса кофелул аьрщаран кумаг бувайссар куклуну «ссихI ласлан», хъатру бигьану кьамул дуллан. Аьрщи азотрал дуччин дувайссар, аьрщаран чара бакъа аьркинсса кьюнукьай шатри кIункIу бувайссар. Кофелуву буссар дургьумунин мюнпатсса магний ва калий.
Ва ялагу, кофелуя нигьа бусайсса бур ахънил зиянчиталгу, цаппарасса зиянчитал кофе сававну литIайссагума бур. Укун, интту ххяхлахимунил лагма-ялтту, аьрщарал ялтту кофе зурзу дурну хъинссар.
ЦIанакул сийлий дур чагъардал фильтр-пакетикирттащалсса кофе. Агана зуннагу ххирахьурча укунсса кофе, пакетикругума экьимабичари, вайгур оьргъашиврун бучIи хьунтIисса.
Кофелул кьункьая нигьа бусайсса бур дургьумунил ялтту тихун-шихунмай занан ххирасса шярал ччитригума.
Чяйлул заварка
Чяйлул заварка, ишла дурну лирчIмур, кьакьан дувара. Заварка ва кофелул дукь ларсса аьрщаравух хIала дуварча, му кIукIлу хьуну, ххяхлахимунища цилва мархри бигьану ва рахIатну тIитIин буван хьунтIиссар. Хъиннура хъинссар хъуни чIапIив бумур чяйлул заварка.
ЦIанава байбивхьуну, салкьи дурсса чяйлул чяма инттухуннай аьркин хьунтIиссар (аьрщаравух хIала дуван дакъагу) дургьумур ххяхлан диркIун махъгу ялтту дичин, аьрщаравусса хъатру дугьлансса къатну.
P.S. Оьргъашиврун ишла дуванмур салкьи дуллан къаччарча (ягу дуллансса кIану бакъахьурча), бучIиссар вай (ккунукрал, чимусул, нувщул, банандалул ккиртту, заварка, кофе, ахъуву ливчIсса чIапIив, чагъар, опилкартту, лах ва м.ц.), ахъуву ца хъунтIа дурккун, най дунура гивун дичлай, ца кIанай цачIун дувангу.
