Дагъусттаннал ХIукуматрал хъуниминнал хIукмулийн бувну, машан ласун най бур МахIачкъалалия Каспийскалийн занази бансса 30 цIусса автобус. ЦУР-данул эфирданий ДР-лул транспортрал ва ххуллурдал хозяйствалул министр МахIаммад Т1агьировлул бувсунни автобусру машан ласаврих харж дан най бушиву 279 миллион арцул.
– Ларгсса шинал сентябрь-октябрь зуруй сукку бувссия транспорт машан ласаврил масъала. Республикалул каялувчитурал, жуцIун бавкьуну, 2023-2024 шиннардий цIусса транспорт машан ласунсса арцу итадаркьунни, – увкунни Т1агьировлул.
МахIачкъалалия Каспийскалийн занази бансса цIусса автобусру ласунтIиссар «Развитие транспортного комплекса РД» тIисса паччахIлугърал региондалул программалул лагрулий.
Региондалул Минтрансрал бусаврийн бувну, газрал ччуччия ишла дуллалисса автобусру бур мушакъатшиву дусса инсантурансса ва укунмасса агьалинансса къулайсса шартIру дусса.
