Меликов хьунаавкьунни МЧС-рал хъунаманащал

Дагъусттаннал БакIчи Сергей Меликов хьунаавкьунни Москавлив Аьрасатнал МЧС-рал хъунама Александр Куренковлущал. ХIасиллу дунни ларгсса шинал тIабиаьтрал ва техногенный нигьачIаву дусса тагьарданий дурсса давурттал. Мукунма ххал бивгьунни нанисса шинал хьхьичI ххуттай щаллу буллансса масъалартту.

2022 шинал кIанттул каялувшиннарал органну ва РСЧС мугьлат бакъа леххаврий бувккун бур ххуллий аварияртту хьусса шанма иширал.
Лещан дурну дур 4000-нния лирчусса пожарду. Ми иширттаву ххассал бувну бур 400-нния ливчусса инсантал. Ххуллурдай аварияртту хьусса кIанттурдайн цIу лещан дайсса ххассалбувултрал подразделениярттайн оьвкусса ишру азарунния ливчусса хьуну бур. Ми иширттаву 183 инсан ххассал увну ур. Укунсса давурттаву аьмну гьуртту хьуну бур 2000-ннийн бивсса инсантал ва 495 техника. Дагъусттаннал БакIчинащалсса ихтилатраву Александр Куренковлул ххишаласса къулагъасрайн ласун багьлагьисса масъалану кIицI лавгунни туристътурал мюхчаншиврул масъала.
«Шиная шинайн Ухссавнил Ккавкказуллал республикарттайн, миннувух Дагъусттаннайнгу, нанисса туристътал чIяву хъанай бур. Мунийн бувну, РСЧС-рал кIанттул система зун аьркинссар, гьарица сезондалуцIун дархIусса нигьачIишивурттугу хIисавравун ларсун, туристътурал мюхчаншиву дузал давриха. Нирхиравун рутан аьркинссар профилактикалул даву», – увкунни министрнал.
– Дагъусттанлувтурал мюхчаншиву жул хьхьичI ххуттайн лавсъсса масъалар. Дагъусттаннал МЧС-рал зузалтрал лайкьну бартбигьлай бур цала къуллугърал буржру. Цукунсса духьурчагу нигьачIисса тагьарданий хха­ссалбувулт мугьлат бакъа леххаврий буккай, аьркинсса куццуй зий бур. ЧIявумур чIумал, балаллухьхьун биривсса инсантал хха­ссал буллай, къучагъшиву ккаккан дуллай бур. Махъсса шиннардий Дагъусттаннайн чIявусса хъамал букIлай бур. Хъамаллуран ххира хьусса кIанттурдай мюхчаншиврул давуртту уттиния тихуннайгу дуллан багьлай бур. ХIарачат буллай буру ххассалбувултрал кумаг зунттал районнай ялапар хъанахъиминначIан чIумуй бияншиврул: дуллай буру цIу лещан дайсса ххассалбувултрал частьру. Ми частирдайн цаппарассаннуйн на нава ивра, ттизаманнул тIалавшиннардай дурну дур, – бувсунни С. Меликовлул.
ЦIана Европанаву ца яла лахъмур зунттал кIанттун ккаллисса Къуруш шяраву дуллай буссар цIулещан дайсса ххассалбувултрал ц1усса часть. Му гьашину дурну къуртал дан ккаккан бувну буссар. Му бакъассагу, ларгсса шинал ЦIуриб шяраву дурссар МахIачкъалаллал ххассалбувултрал къуллугърал (ПСС) ва ххассалбувултрал подразделениялул цIусса къатри. Махъсса кIира шинал дянив зунттал районнай дурну дур ххассалбувултрал подразделениярттансса урчIрайра къатри ва к1ива пожарный депо.
Хьунабакьаврий мукунма кIицI лавгунни 2022 шинал республикалул цифрардал трансформациялул программалувун бувтшиву захIматсса тагьардануву (ЧС) зарал бивсса агьалинан арцуйнусса кумаг баврил хIаллихшиннардал масъала.