[dropcap]Н[/dropcap]оябрь зурул ахирданий Къазаннал федерал университетраву хьусса Дунияллул халкьуннал дянивсса студентътурал ва аспирантътурал элмулул ва практикалул конвентрай хьхьичIунсса кIану бувгьуну бур Ухссавнил Ккавкказнал институтраву дуклакисса жула лакку оьрчI, ХIажинал арс Айгумов Рамазаннул. Ванил ялув институтрал директор ХIусайн МахIаммадовлул Лакрал райондалул бакIчи Юсуп МахIаммадовлуйн гьан бувну бур укунсса чагъар..
ХIурмат бусса Юсуп ХIамидович!
Щалагу Аьрасатнал паччахIлугърал юстициялул университетрал биялалийсса Ухссавнил Ккавкказнал институтрал хъинсса аьдат дуссар студентътал республикалул, щалагу Аьрасатнал, дунияллул халкьуннал лагрулийсса форумирттай, олимпиадарттай гьуртту шайсса.
Вана жул институтрал шамилчинмур курсирал студент, Гъумучиял шяраватусса Айгумов Рамазаннул ноябрь зурул ахирданий Къазаннал федерал университетраву хьусса халкьуннал дянивсса студентътурал ва аспирантътурал конвентрай «Финансовое и налоговое право» тIисса секциялий, цIакьсса муттаэтуращал данди увккун, лавайсса даража чIалачIи бунни, шамилчинмур кIану бувгьунни.
Мува куццуй, Рамазаннул 2-мур кIану бувгьунни Ростоврай Ухссавнил Ккавкказнал вузирдал дянив хьусса «Актуальные проблемы экологического права» тIисса ккуркки столданий.
Жул пикрилий, Рамазаннун биттур бан багьссар институтрал каялувчитурал цайва бивхьусса бигьа бакъасса мурад – Дагъусттаннахсса бургаву даххана дансса, цайми регионнал дянив жула республикалул хIурмат лавай бансса, цIа ларай дансса.
Умуд бур жул студентнал хьхьичIуннайшивурттах, Аьрасатнал лавайсса дуккаврил идарарттал дянив дагъусттаннал кIулшиву дулаврил сий лахъ дан ванал бивхьусса захIматрах зугу къулагъас данссар, кьимат бищунссар тIисса.
ХIурматращал институтрал директор
ХIусайн МахIаммадов
