Лак цIусса миналийн бизан баврил ва Аухуллал район цIу дуккан даврил масъалартталсса буллалисса ДР-лул ХIукуматрал Управлениялул хъунаману ивтсса МахIаммад-ХIажи Айдиевлул цува зузисса идаралул лагма-ялттусса кIанттурдай дунни субботник.
[dropcap]Ш[/dropcap]икку гьуртту хьунни Управлениялул коллектив ва «Дирекция «Новострой» ГКУ-лул зузалт. Ххуллун ва алхIаткьинирдай зузалтрал марцI бунни администрациялул идаралул лагма-ялттусса кIанттурду, даххана дунни чурттурдайсса плиткарду, ранг дунни чапарду ва м.ц.
Управлениялул хъунаманал сипталийн бувну, идаралул чурттурдай дишин най бур цIуллу-сагъшиврул мушакъатминнаща лахъан бюхъайсса пандусру. Ми дишаврихсса харжлугъ цала бакIрайн ларсунни «Экспертиза» ООО-лул каялувчитурал.
– Ххал бара, цуксса тIааьнну бурив идаралул лагма-ялттусса кIанттурду, марцI бувну, низамрайн бувцуну махъ. Хъунмасса барчаллагь давривух хIала бувхсса цинявппагу коллегахъан. КIицI лаганну, архIал зий, субботникру дуллай коллективрал дянивсса нахIу-хIалимшиву хъиннура цIакь шайшиву, – увкунни МахIаммад-ХIажи Айдиевлул.
