«ЦIусса шинал каникуллу Москавлив, мачча-гъанцириннал дянив гьан дуллай ура. Жулва билаятрал дякюрттарайн ивукун, къашай­ссия ттуща 45 шин Дагъусттаннал цIуллушиву дуруччаврил къуллугърай зий гьан дурсса Зинаида ХIусайхановащал хьунакъаавкьуну ацIан, ванил уттигъанну 70 шинал юбилейгу диркIнавхьур.

Зинаида Алексеевнал чIя­русса шинну МахIач­къалаллал цалчинмур азарханалун дуллу­ссар. Хъунама хIакиннал хъиривчуну буссия ва хъин буваврил даврилсса буллай, ва къуллугърай ванил цуппа республикалул медициналуву хъунмасса къала бушиву ккаккан бувссар. Ванил опыт, дазу дакъа цилла даву ххирашиву мудангу жун эбратрансса хIуччардур. Зинаида Алексеевнащалсса хьунаакьаву язими дустуращалсса хьунни. Ва жулва азарханалий ва Дагъусттаннал медициналуву хъанахъимуния архну бавцIуну бакъар, дакI цIуцIаву дуну бур, бучIи лякъинсса маслихIатру буллай бур. Зинаида Алексеевна Дагъусттаннал медициналул лажинни. ЦIуллушиву дуруччаврил культура, жан исватну чIалачIиссар укун дакIнихтуну захIмат бивхьусса инсантурал оьрмурдавату. Дазу дакъасса барчаллагь вил захIматрахлу, Зинаида Алексеевнай!» – укун тIий чивчунни МахIачкъалаллал 1-мур азарханалул хъунама хIакин, Да­гъусттаннал Халкьуннал мажлисрал депутат ХIажимурад Малаевлул Телеграмрайсса цала каналданий.

ТIайламур бусан, хъуннасса ххаришивугу, хха­ришивруцIун пахругу багьуна ттувун укун лавайсса кьимат ттулва шяравадушнил захIматран бищаврия. Зинаида – Дагъусттаннал лайкь хьусса хIакинни, зий буссия МахIачкъала шагьрулул ЦIуллу-сагъшиву дуруччаврил управлениялул хъунаманал хъиривчуну, вава идаралул хъунама терапевтнугу. Буниялттунгу, цилла даву куртIну кIулсса, шагьрулул цIуллу-сагъшиву дуруччаврил даву лавайсса даражалийн гьаз дувавриву биялсса бутIа бивхьусса инсанни. Ххирассар ванин буттал аьрщи, цилва миллат, миллатрал культура. Буттал шяраваллия, 1-мур ЦIувкIуллая, ванил пасихIшиврул даражалий чирчусса макьалартту дуркссар республикалул кказитир­ттай оьрус мазрай. Лахъсса къуллугъирттай зий бивкIнугу, дакI хъун дакъасса, адаврай къуццу тIутIисса, цищава шайсса хъинбала инсантуран буван чялиш буккайсса инсанни. Пандемиялул ппурттувугу ванийн къаувксса инсан лакравугу, къалакравугу ушиву къакIулли. Бусан аьркинни ва къуллугъ кьабивтсса полковник, фронтовик СантIуев Аьлиллул душ бушивугу. Паспортрай буттал цIа Алексей дуну тIийри ванийн документирттайн бувну «Алексеевна» учайссагу.

СантIухъал Аьлил ЦIув­кIу­ллал фронтовиктурава махъа-махъ дунияллия лавгмая, шяраваллил жяматрал оьрмулул иширттаву хъуни-хъунисса давуртту дурсса, жагьилтураву тарбиялул гьану бивзсса инсанъя. Ванал тарбиялул гьанугу, гьай-гьай, Зинаидаву цIакьссар. ХIусайхановхъал ва СантIуевхъал тухумру кIулнан Зинаида кIулссар ххаллил­сса нину ва кулпат хIисаврайгу. Ванил лас ХIусайханов Ма­хIаммадбаг хIурмат бусса профессор, академикри. КIиягу арсгу, душгу ххуйсса давурттай, нину-ппу кунма, агьалинан бусравну буссар. Зинаида махъсса шиннардий Москавлив бивзун бур, вузраву ккалаккисса наслулул чIарав бацIаншиврул. Цийвасса циняв бигарду лайкьну бартбивгьусса Зинаида вава бюхъулий бартбигьлай бур хъуннабавашиврул бигаргу.
ЧI\алну бунугу, барча дуллай буру ванил 70 шинал юбилейгу. ЧIа тIий буру цIуллусса чIярусса шинну, кулпатравуминнаясса тирхханну!