Хасъсса аьралий операциялий щавурду дирсса Дагъусттаннаясса ххюя аьраличу усса ур хIакьину Къарабудахкантуллал райондалийсса «Весна» тIисса мушакъатминнансса бигьалагай базалий реабилитациялий.
Идаралул директор Аьли Мусаевлул бусаврийн бувну, базалий хIасул дурну дусса дур мукунминнан къулайсса хIаллихшиннарду.
«ЦIанакул дур кIи, хьхьирийн гьан хъанай бакъар, амма гьавалийн уккан, аьркинсса процедурарду бан бюхълай бур. Мукунма, мушакъатминнал медициналул дузалшинна дан жу оьвчайссар цайми идарарттай зузисса медсестрахъайнгу. Му бакъассагу, щавурду дирсса аьралитал хасъсса транспортрай буцлантIиссар экскурсиярттай», – бувчIин бунни Мусаевлул.
Ванал кIицI лавгунни ца сезондалий хасъсса бигьалагай базалий реабилитация дан кьамул ан бюхъан тIий бушиву 500-ннийн ивсса инсан (ца курс ацIва гьантлийсса хIисав бувну).
ДакIнийн бутанну, ттигъанну «Весна» бигьалагай базалул ялтту уккан лавгун ур Республикалул БакIчи Сергей Меликов. Къарабудахкантуллал райондалул мушакъатминнал ккурандалун Республикалул БакIчи цачIана учIаннинма пикри хьуну бусса бур хасъсса аьралий операциялий щавурду дирсса, ка-ччан дагьсса аьралитал цачIава кьамул буллан. Итникьини шикку кьамул увну усса ур цалчинсса ххюя инсан. Къарабудахкантуллал мушакъатминнал ккурандалул вай хьунабавкьуну бур хъуннасса шадлугърай. База ккаккан бувну махъ ккаккан дурну дур цала хIадур дурсса концерт.
Хасъсса аьралий операция нанисса кIанттай февраль зуруя шийнай ивкIсса лейтенант Наби Койчакаев увкIун ур ччаннайн щаву дирну. Ванал бувхIуну бур мукьва операция, багьлай бусса бур ттигу тамансса операцияртту бан. «ТIайламур бусан, къакIулссия жучIава, Дагъусттаннай, укун ххаллилсса база бивкIшиву. Барчаллагь хьуннав ва база сакин бувминнан ва жуйн реабилитация дан оьвкуминнайн», – тIий ур Койчакаев.
Мариупольллай щаву дирсса Буйнакскаллал 136-мур мотострелковый бригадалул разведчик Темирлан Абакаров дачIи шинал лажиндарай хъин хъанай ивкIун ур билаятрал личIи-личIисса госпиталлай, бювхъуну бур ччан сахла бан.
«Шикку ттун гьарзатрай дакI даркьунни. Гъинттул кулпатращал учIан дакIний ура», – тIий ур аьраличу.
Багьауттин Аьлиевлун тIурча, 12 операция барчагу, кумаг къавхьуну, ччан кьукьин багьну бур. Амма чумартсса зунтталчу цIанакулгу зий усса ур военкоматрай.
«ДикIайссар чIун инсантурахь барчаллагь учин бучIисса, дикIайссар чIун инсантурахь барчаллагь учин аьркинсса. ХIакьину, ва базалийн цалчин учIайхтува, ттун чIалай бур шикку мушакъатсса инсантурансса къулайшиннарду дакIнихтуну дузал дурну душиву. Шикку цинявппа куннан кув бувчIлай бур. ДакI дарцIуну ура ва хасъсса база ваниярвагу хьхьичIунмай баврил ялув чаранну ттигу лякъинссар тIий, шиккун бигьалаган бучIайми чIяву хьуншиврул», – тIий ур Аьлиев.
