Январьданул 25-нний «Дагестан» РГВК-лий хьунни региондалул каялувчи Сергей Меликовлущалсса тIайланнасса эфир. Шанна ссятрал мутталий Республикалул БакIчинал жавабру дуллунни цахьхьунма буллусса 35 суалданухьхьун. Цинявппагу дагъусттанлувтурая Сергей МеликовлучIан бувкIун бия личIи-личIисса каналлавух 4, 5 азарунниха ливчусса суаллу ва лабизавуртту.
Сергей Меликовлул жавабру дуллунни хъинну агьамсса суаллахьхьун. Ми бия региондалий догазификациялул программа бартдигьаврил, ЖКХ-лул масъаларттал, электроэнергиялул ва щинал дузал баврил, инвалидтуран кумагру баврил, территориярттаву дузалшинну даврил хIакъиравусса.
Республикалул каялувчинал бувсунни мукунма Дагъусттаннал футболданул тагьардания ва ялун бучIантIимуния. МахIачкъалалив автобусру бацIайсса кIанттурдай дузалшинну даврия, машинартту бацIан байсса кIанттурду биялсса бакъашиврул сававрттая. Бувсунни мукунма Расул ХIамзатовлун 100 шин шаврил юбилейран хасъсса шадлугъру даврил хIакъиравугу.
«Агьамшиву хIисавравун ласурча, цалчинмур кIанттай бишин аьркинну чIалай бур ЖКХ-лул масъаларттацIун бавхIусса суаллу, цIусса шинал цалчинми гьантрай гьамин вайннул буруккин бия чIявусса дагъусттанлувтурал. Жу вай масъаларттаха зий буру, хIарачат буллай буру ялун нанисса чIумал ххишала мукунсса захIматшивуртту хьун къадитан.
Ва ялагу, инсантурал ччя-ччяни кIицI буллан бивкIунни жучIава хъанахъисса законну лиян дуллалисса иширттая. Гьамин, муниятур жу агьалинал жущалласса дахIаву дузал дуллалисса, миннал захIматсса масъаларттал хIакъираву жун баян баншиврул. Мукунсса дахIаврил жун кумаг буллалиссар инсантурал тIимур баян, миннал масъалартту дузал баншиврул», – кунни Дагъусттаннал БакIчинал.
СВО-лий жан дуллусса Аьрасатнал Виричу НурмахIаммад ХIажимахIаммадовлул нину Сапижат Мазаевал цIувххунни Дагъусттаннал БакIчинахь, СВО-лий накьлу хьусса аьралитурал цIарду абад дувантIиссарив, куну. Мунил мукунма бувсунни хасъсса дяъвилул операциялий арс ивкIусса ца хъамитайпалул тавакъю бувну бивкIшиву ца кIичIираваллин арснал цIа дизан, амма га къуллугъчинал га хъамитайпалухь ттярзлий адав дакъасса жаваб дуллуну дур. Сергей Меликовлул тапшур бувну бур гацIанава лякъин адав дакъасса тIул дурсса къуллугъчи. «СВО-лий ливтIусса аьралитурал цIарду абад даврицIун бавхIусса масъалартту ххал бигьлай буссар Верховный главнокомандующийнал, обороналул министрнал ва СВО-лущал дахIаву дусса цаймигу каялувчитурал тапшурлугъру бартдигьаврил аралуву.
Цайми кучардал цIарду даххана дуван захIмат хъанай бухьурча, жущава бюхълай бур миннал цIарду дизан цIуну бувсса кучардан, школарттан, спортрал объектирттан. Жува буржлувссару ва даву дачин дуван», – кунни Дагъусттаннал БакIчинал. Мунал тапшур бунни МахIач Оьмаровлуйн информация салкьи дуван, циксса дуссарив СВО-лий ливтIусса аьралитурал цIарду дирзсса ултти лархъун кучардай, циксса дуссарив дацIан дурну миннан гьайкаллу, бюстру. Сергей Меликовлул барчаллагь кунни Сапижат Мазаевахь дуллалисса давурттахлу. «Барчаллагь вин хъунмасса, жува ччя-ччяни хьунабакьару, ттинияр гихунмайгу хьунабакьланссару. Бусласу жухь ниттихъал, щахъаннил, гъан-маччассаннал масъаларттая», – кунни Меликовлул.
МахIачкъалаллал таксист МахIмудлул суал буллунни, ххуллурдай апатIру чан хьуншиврул ци бан аьркинссар тIисса.
Сергей Меликовлул жавабран тIимунийну, апатIирттал сававртту ххуллурду ххуйсса бакъашивруяр ххишала машиналул техникийсса тагьаргу хъанай дур: машинарттал тормозру къаххуйну зузаву, ягу передачартту даххана къахъанахъавугу сававну шайсса бур апатIру.
Республикалул каялувчинал бувсунни гьашину бивщуну бушиву му захIматсса тагьарданун экспертътурал кьимат, МВД-лул ва МЧС-рал ххуллул мюхчаншиврул каялувчигу гьурттуну.
«Яла гъансса шиннардий байбишинну Дарбантуллал, МахIачкъалаллал ва Хасавюртуллал лагмасса ххуллурду буллай. Вай ххуллурду дузал бантIиссар отбойникирттал, камерардал ва гьарца аьркинлугърал», – кунни республикалул хъунаманал.
Дагъусттаннал БакIчинал жаваб дуллунни республикалий гьавалул тагьар даххана хьуну чирахъру лещан баврицIунсса суалданухьхьун. Авария сававну чани лещан баву ца яла агьаммурну хъанай бур. Энергетиктурал бусаврийну, чIявуми пишакартал зий бивкIун бур хъинну захIматсса тагьардануву дяхттагу, хьхьувайгу. ЦIанагу зий бусса бур мува масъала дузал бавриха.
Ца хъамитайпалул суал буллунни «Уйташ» аэропортраяту МахIачкъалалив жяматрансса транспорт зузи даврил хIакъираву. Сергей Меликовлул тIимунийну, мува суал булайсса бур туристътуралгу. Мунихьхьун жаваб дуллай, Республикалул БакIчинал бувсунни цIанасса ппурттуву ДР-лул Транспортрал министерствалул конкурс буллай бушиву тиккун занансса автобус батIул баву мурадрай. Мунал тIимунийну, транспорт хIадур даврищал архIал аэропортрай дуллантIий бур аьркинсса инфраструктурагу.
Мунияр ххишалагу, цIанасса ппурттуву дуллай бусса бур Р-217 федерал трассалул реконструкциягу. Ххуллу бакьин баврияр ххишала дуллантIий бур ххуллул чIарахсса инфраструктурагу.
Сергей Меликовлул жавабру дуллунни цаймигу суллахьхьун.
