Сурат – му абад бувсса лахIзар

ЧIалну бавунни ттун лазгиял кказитрай зузисса ттула коллегахъаяту декабрь зуруй дунияллия лавгшиву Да­гъусттаннал журналистътуран ва буккултран ххуйну кIулсса фотокорреспондент Тажуттин МахIаммадов (Юхвари).

Ва Сулайман Стальскийл райондалийсса Юхвари тIисса шяраву увну ур, псевдонимнугу бу­ттал шяраваллил цIа ларсун дур. ОьрчIнийва ятинну ливчIсса ва Каспийскалийсса интернатрай дуклай ивкIун ур. Ванал цала бусайва, интернатраву оьрчIру, аьда­да чIун гьан къадулланшиврул, чара бакъа цукунсса-дунугу журалул кружокрайн занан аьркинссия, цалла фотокружок язи дургьуссия, шагьрулул конкурсрай ххув хьуну тIий, «Зоркий» тIисса фотоаппарат бахшиш бувна, тания махъ фотоаппарат каруннища щяв къабивхьуссар тIий.

Цаппара шиннардий зий ­уссия Юхвари «Илчилул» фотокоррес­пондентнугу. Тани кказитрал даву личIисса бущилий най дуссия, гьарцагу мероприятиялийн, аьрххилийн чара бакъа суратрищугу журналистнащал архIал икIайссия. Ттун дакIнийссаксса, дахьва ччаннай бацIлацIисса «Илчилул» редакциялухь дакъая фотоаппаратру, аьркинсса цамур ласунсса каши. Юхвари рязи хьуна, лазгиял кказитрайгу зий, бачIи ставкалий «Илчилийгу» зун. Ванал архивраву диялсса дуссар лакрал оьрмулул иширттацIун дархIусса суратру.

Шиккува кIицI лаган ччива, тай шиннардий ванал хIарачатрайну, «Дагъусттаннал правда» кказитрая тIайла хьуну, республикалул кказитирттай дикIайссия лакрал язими арсурваврал, душваврал тамансса суратругу. ЧIявуну ванал тикрал бувайсса махъругу дакIний ливчIунни: «Сурат – абад бувсса лахIзар. Агар суратраву оьр­мулул тарг бишин хьурча – му ларайсса магьирлугъри. Камерагу тIайла бувну, ччиманаща шай­ссар сурат рищун. Бюхъулий, ус­ттарну сурат ласун тIурчарив, гива, дакIниватусса, ябитаву дикIан аьркинссар».
ЧIярусса дур Юхварил «Илчилий» рирщусса суратирттаву дакIнивату нанисса ябитаврил чанна дурссагу. Аьпа баннав вил, инара язи дургьусса даврил ус­ттар, магьир!
Суратру Тажуттин Юхварил архиврава