АхъницIунсса маслихIатру

Муркъилийнияр ахъуву хъинмуния

КIинттул ахъуву, дачалий дулланмур къадикIай. Ванийн бувну кIи дур интту ишла дувансса оьргъашиврун аьркинмур салкьи дуллан яла хъинмур чIун. Оьргъашиврун ишла дуван бюхълай бур, жура дуркуну, дукралун ишла дурну лирчIмургума. Ванийн бувну, анавар мабуккару ккунукрал, нувщул, чимусул, пуртихалданул, банандалул макьартту-ккиртту, заваркалул чяма экьибичин. Вай цимурца жущара инттухуннай ахъуву, дачалий мюнпатну аьркин дан хьунтIиссар. Шиву чIявуссар дугьлагьимунин чара бакъа аьркинсса витаминну ва цаймигу затру.


Ккунукрал макьара
Инттухуннай ва кальцийрал авадансса оьргъашиву ишла дуван хьунтIиссар нувщи, помидор, перец, бадиржан, хъюрув, калан, чимус, къур, къавахъ, накьлил уртту ххяххан дуллалийни.

* * *
Ккунук ишла бувтари, макьара, гиву лирчIмуниягу марцI бувну шювшуну, кьакьан битира. Кьавкьун махъ, мюрш бувну, чагъарданул кьуцурттувун ягу коробкалувун, банкалувун (так кьалакьи малакьару) бичара. Гьарца ккунук ишла бувтари ва даву дуллай, чан-чанну тIий, инттунин биялсса макьартту салкьи хьунтIиссар.
Ишла буван аьркинссар шахьлахьи къабувмур ккунукрал макьара. Ххуйну кьакьан бувну, мюрш бувну махъ ми бичира чагъарданул кьуцурттувун ягу коробкалувун.

Чимусул ккиртту
Вай аьркин хьунтIиссар, ца оьргъашивуну бакъассагу, ахъуву чан бакъасса зиянчитуращалсса талатаврингу.
Чимусул ккирттал оьргъашиву ишла дуван хьунтIиссар нисварти, помидор, перец, къавахъ, нувщи, къур, калан бугьлагьийни ва ххяххан буллалийни. КIинттулва салкьи буллай, кьакьан буллалира чимусул ккиртту.

Банандалул ккиртту
КIилахъаннин лавхъсса батареялий кьакьан булувара гьарца банан дуркутари ливксса ккири, ва бучIиссар бургъилу, гьавалий кьакьан бувангу. Ххуйну кьавкьсса ккири, мюрш бувну, инттунин букьара чагъарданул кьуцурттувун ягу коробкалувун.

Нувщул ххянчру
Нувщул ххянчру инттунин микIлачIун дувара ягу кьакьан дувара. Кьакьан дуван бучIиссар гьавалий, так бургъил тIайланнасса тIинтту къащиланну.
Ахънин мюнпатран ишла дуван бучIиссар так шакъавхьми нувщул ххянчру. Инттунин ядувара ялтту мяххи къадакьинну, хъакъатанну.
Гихунмайгу буссар