Январьданул 17-нний Дагъусттаннал Халкьуннал Мажлисрал председатель Заур Аскандаров хьунаавкьунни республикалул СМИ-лул хъуниминнащал.
Хьунабакьаврий гьуртту хьунни вице-спикер Камил Давдиев, парламентрал комитетрал хъунама Фирудин Ражабов. Парламентрал спикернал бувсунни, цува даврил иширай Пятигорскалий уну, Печатьрал кьини журналистътал барча буван къавхьушиву. Бувсунни ванал парламентрал 2022 шинал 12 сессиялул лагрулий 105 закон кьамул дуршиву ва 83 хIукму цIакь бувшиву. Агьалинал социал тагьар къулай дуваву мурадрайсса законну, мукунна бизнесрацIун кабакьаву дуллалисса, туризм гьаз дуллалисса проектру ххал диргьушиву. Ванал барчаллагь увкунни Мажлисрал давурттая агьалинахь бусласиминнахь, кIицI лавгунни депутатътуралгу, журналистътуралгу аьмсса мурад бушиву агьалинан ххуйсса оьрму дузал баву, хайр-мюнпатсса проектру бартдигьаву. Республикалул СМИ-лул хъуниминнал бувсунни цала давурттая ва хьунадакьлакьисса захIматшивурттая, журналистътурал харжру лагьсса бушиврия. Заур Аскандаровлул махъ буллунни ва масъалалух дагьайкунсса къулагъас дуван. ЧIярусса шиннардий буллалисса захIматран кьимат бивщуну, ванал парламентрал цIаниятусса цIа чирчусса каний дахIай ссятру ва Барчаллагьрал чагъарду буллунни журналистътуран.
