Украиннал аьрщарай спецоперация байбивхьуния шинмай чIявусса инсантал бувккунни, ватандалул мурадру буруччаврил цIаний шаймур буллай, кумагру буллалисса. Ахъушиял райондалийсса ЦIуликъяннал шяраватусса Илиясовхъал кулпатгу тинмайну къабавцIунни.
МахIачкъалалив яхъанахъисса, ци кумаг буван хъинавав виртталну талатисса жагьилтуран тIий пикрирдайсса ХIажинан дакIнийн багьну бур чанигу буллалисса, гъилишивугу дуллалисса, гьаннайсса, окопирттаву ишла дуллансса хъамул чирахъру буварча тIисса пикри. «Комсомольская правда» кказитрай бакIрайн дагьну бур ванан хъамул чирахъирттаятусса макьала, интернетраву хъирив увккун, лавхьхьуну бур ми цукун бувайссарив. Пермь шагьрулий яхъанахъисса арснал 200 килограмм парафиндалул тIайла дурккун дур. Ванал кулпат Марзият рестораннайх, кафердавух буклай бивкIун бур, дачIрасса муххал къутив датIлай.
– Ттущара вайксса чIярусса къутив лякъин къахьунсса ххива. Картонналул къуршивгу аьркин багьлай бия. Лаптиевлул кIичIиравусса жул квартира муххал къутал ва картонналул къуршал бувцIуна. ХIажи гъирарай зий улувкьуну ия, жугу ванан жущава шайсса кумаг буллай бивкIру. Гьай-гьай, бигьану дайсса даву дакъар, амма фронтран кумаг буван бюхълай бушиврий рязину, окопирттаву жулва талаталтран чанигу буллалисса, гъилишивугу дуллалисса, чяйлул ххув учин щингу щаралахъан хьунтIисса чирахъругу буллай бушиврул, жуятува ва чIиви-хъунсса кумаг хьунтIий бушиврул жул дакIру гъили дуллай дия, – тIий бур Марзият.
Вайннал гьарзат машан ласун аьркинмур цала ларсун дур, учиннуча, хъамул чирахъирттал комбинат ичIува тIивтIуну бур, утти, хавар хьуну, кумаг буван, чIарав бацIан ччисса буклай бур тIий бур. На вайнначIан оьвкусса итникьини Марзиятлул бувсунни 500 къути фронтрайн тIайла дуркшиву, цивппа цIусса партиягу хIадур дуллай бушиву.
Барчаллагьрихха укун дугърисса даву дуван дакIнийн багьсса ва, чIунгу харж дуллай, захIматгу буллай зузисса уздансса кулпатран. Зул хъиншиву хъиншиврийну зана дикIаннав, ХIажи ва Марзият, цIуллушиву дулуннав зухьхьун!
