Уттигъанну МахIачкъалалив Республикалул Художниктурал союзраву тIиртIунни «Дагъусттаннал щаращив» тIисса цIанилусса выставка. Ва хъанахъиссар Республикалул «Самородки» цIанилусса проектрал лагрулий дуллалисса цайнува цивппа хьусса художниктурал выставка.

Ва сакин дурну дия Респуб­ликалул Культуралул министерствалул ва Халкьуннал творчествалул къатлул, Республикалул Художниктурал союзрал гьур­ттушиврийну ва Аьрасатнал Халкьуннал культуралул ирсирал шинал лагрулий.

Ккаккиялун дирхьуну дия цайнува цивппа хьусса 37 художникнал дирхьусса 200-нния лирчусса давуртту.
Выставка тIитIлатIисса шадлугърай гьуртту хьуна Республикалул Халкьуннал творчествалул къатлул директор Марита МухIадова, Дагъусттан Республикалул Художниктурал союзрал председатель Кьурбан­аьли МахIаммадов, М. Жамаллул цIанийссаДагъусттаннал Художествалул училищалул директор Мухтар Камбулатов, Республикалул дуккаврил-методикалул центрданул директор Калимат Эльдарова ва чIявусса цаймигу.

Республикалул культуралул министр Зарема Буттаевал цIаниятугу бавтIми барча буллай, Марита МухIадовал увкуна:
– ХIакьину выставкалий ду­ссар уттинин къакIулну ивкIсса цIусса 10 художникнал дирхьу­сса суратру. ЦIусса цIарду ялун личин даврил хъуннасса агьамшиву дуссар, цанчирча творчествалуву цалчинсса шаттирду ласласисса инсаннан цахрасса, цалла дуллалимунихсса къулагъас чIалачIисса чIумал, ванай хъару ххяххайссар, цалва гужирдай хъиннура дакI дацIайссар, ванил хIасилнугу шайссар цIу-цIусса давуртту. Ва кIанттул агьамшиву къачIириссар цIу-цIусса давур­ттая хIаз ласласисса тамашачитурангу.

Художествалул культуралувун кIункIу хьусса жагьилтал – ми ляличIиссава жагьилталли, пикри буллан, ня щурущи дуллан кIулсса. Дурсса хасъсса дуккаву, ларсъсса пишакаршиву да­къана художествалул творчествалухун багьсса инсантал махъсса шиннардий щалла дунияллийва чIяву хьуну най бур. «Самородки» проектрал щаллу буллалисса мурадгу укунсса инсантурал, вай ялун личин баврищал, чIарав бацIавур. ЧIа тIий буру выставкалул гьур­ттучитуран гихунмай зунсса гъира-гьавас, цIакьсса цIуллу-сагъшиву, дунияллий дакьаву, – увкуна ванил.
Выставкалул тамашачитуравух бия шагьрулул школарттал дуклаки оьрчIру ва республикалул вузирттал студентътал.
Выставка лахъи лагантIиссар ялун нанисса шинал январьданул 15-ннин.