ЦIушинал байрандалул бигьалагай гьантри мюнпатну гьан буван, лечин, турникирттайн гьаз хьун, спортрал бяст-ччаллил тIуркIурдаву гьуртту хьун, лакрал жагьилтал январь зурул арулунний Тарки зунттуйн бувккун бия. Ккуллал райондалул жагьилтурал ккурандалул (ДРОО-лул) хъунама Гуйдалаев АьбдурахIман ия ва даврил сиптачи. Спортрал тIуркIурдал чарслул дайдихьу Тарки зунттуйн лечавриясса дия, лечин увккун ия гъира бума, карчI дакъама. Гьуртту хьуна Ккуллал райондалул имам МухIаммад-Маннар Бариев, Лакрал жагьилтурал ккурандалул хъунама Давуд Атаев.

– Ххуйсса мероприятие хьунни, на барчаллагьрай ура гьуртту хьун увкIсса гьарцаннайн, спортрахун машхул шаврияр ххишала цамур ххуйшивугу дуссар укунсса давурттаву: жагьилтал цачIунмай буллалиссар, гъан буллалиссар, – увкунни Давуд Атаевлул.

Вара кьини лакрал жагьилтурал ккураннал хъуними хьунабавкьунни Таркиллал хъунама Аьли ХIусмановлущал ва Таркиллал, Альбурикантуллал ва Кяхуляйрал Бугьараминнал советрал хъунаманал хъиривчу Аьбдулнасыр Кьадировлущал. Вайннащалсса ихтилатирттавугу гьаз бунни жагьилтал Тарки зунттуй спортрал тIуркIурдахун бутаврил масъалартту, спортрал ва диндалул тарбия дулаврия, школалий дуклакисса оьрчIругу хIалану жагьилтал кIюрххила Таркилийн буккан бувну, спортрахун бутансса хIарачат буллан аьркиншиврия. Гихунмай хьунни турникирттайсса ва цаймигу журалул бяст-ччаллайсса тIуркIурду. ХьхьичIун ливчуминнан дуллунни грамотартту.