ЦIусса шинал дайдихьулий МахIачкъалалив Батирайл цIанийсса кIичIираву (66-мур къатраву) лахъа-хъунну тIивтIунни «Жулами» тIисса лакку цIанищалсса лакрал ресторан.

Ресторан тIивтIунни Гьамиящиял шяравасса ссура­хъал – Зураб Нугъаевлул ва Аьли Аьли­мовлул. Лак батIлансса, лакрал ккуранну цачIун дуллан­сса ца уттигу ресторан ххишала хьунни жула хъун шагьрулий. Ресторан тIивтIусса вай кIиягу жагьил ур бюхъу-бажар бусса, цивппа зузисса кIанттурдайгу хьхьичIунсса.
Зураб Нугъаев шагьрулул администрациялул ца отделданий каялувшиву дуллай ур. Аьли Аьлимов Москавлив Кремлилул поликлиникалий стоматологну зий ур.
Махъсса ппурттуву Да­гъусттаннайн чIявусса туристътал букIлан бивкIукун, вайннан пикри хьуну бур, туристъталгу, тиха-шихасса цала дусталгу, шиккувасса инсанталгу кьамул буллансса ресторан тIитIин.

Ресторандалул дизайнгу дурну дур Дагъусттаннал этника хIисавравун ларсун. Дизайн дурмагу ур жула лакку оьрчI ХIажи Мудунов.
РяхцIала инсан кьамул ан бюхълай бур цIанасса чIумал, гихунмайгу, гьарта-гьарза хьун­сса пикрилий бур. Меню сакин дурну дур Дагъусттанналгу, цайми миллатиртталгу дукрарду хIисавравун ларсун. Ресторандалул дур «Жулами» тIисса цивппа авторталсса чай. Утти ванийн «Лакку чяй» тIий бур. ХIакьину ресторандалуву зий ур 30 инсан. Зузалтгу вайннал кIул буллай, хъирив лаллай, гьарзат хIисавравун ларсун, язи бувгьуну бур.

Шикку дукра дуллалими цинявппагу арамтал бур. ТIивтIуну хъунма хIал къавхьунугу, вайннал дукрардал нахIушиврия цIа дур.
Ресторан тIитIлатIисса кьини шиву чIявусса хъамал бия. Миннал хьхьичI ккаккан дуллай бия Бархъаллал тIахIунттив дайсса, Табасараннал бартбисуртту щащайсса куц. Му кьинисса шадлугърай гьуртту хьун бувкIун бия Дагъусттаннал эстрадалул цIанихсса артистътал: Лариса ХIажиева, Луиза Шахдилова, Рашид Багатаев, Зайнаб Махаева, Лаурита, Аьбдул Мурадов, Самед Буттаев, «Гордость Дагестана» ансамбль, блогертал – Булат Чанкалаев ва Шамил Аьскаров.
Мажлис бачин бувну ия машгьурсса тамада ­Аьзим Давыдов.

Барча бавурттая махъ, «Жулами» тIисса хъунмасса торт бухъан тапшур, вихшала бунни Зураблул ниттийн Зурмукатлуйн.
Хъирив хъамаллурал дянив бунни 16 журалул бахшишру духлахисса тIуркIугу.
Бахшиширттаву дия Заи­ра Гордэл каних дурсса чIю­лушиннарду, ресторандалул сертификатру. Яла хъунмамур приз бия AirPods наушникру. Цаягу хъамаличу шичча бахшиш дакъа къалавгунни.

Ресторандалувун цала кьини хъун дан бувкIсса цинявннахь барчаллагь увкунни Зураблул ва Аьлил.
– ХIурмат бусса хъамал, ххирасса дустал!

Цума-цанналгу бухьунссар, ххаринийгу, пашманнийгу щяикIан, игьалаган ччисса, дакIнил лавсъсса кIанттурду. Муна мукунсса кIанттуну хьунтIиссар зун жул ресторан. Зу шикку мудангу «жуламину» бикIантIиссару. Муниятур жу ресторандалунгу «Жулами» тIисса цIа дирзсса. Умуд бур жула ресторан гьарица шивун увкIманан цала ичIува куна рахIатну, игьалавгун икIансса кIанттуну хьунссар тIисса. Жу зух мудангу ялагьлай буссару, мудангу зуяту ххариссару.

Имара Саидова
Андриана Аьбдуллаева